ಇಸ್ರೇಲ್ ಅಕ್ರಮ ವಸಾಹತು ಸರಕುಗಳ ವ್ಯಾಪಾರ ನಿಷೇಧಿಸಲು 12 ದೇಶಗಳ ಜಂಟಿ ಘೋಷಣೆ

ಪಶ್ಚಿಮ ದಂಡೆಯಲ್ಲಿ ಇಸ್ರೇಲ್ ಸರ್ಕಾರ ನಡೆಸುತ್ತಿರುವ ಅಕ್ರಮ ವಸಾಹತು ವಿಸ್ತರಣೆ ಮತ್ತು ಹಿಂಸಾಚಾರದಿಂದಾಗಿ ದ್ವಿ-ರಾಷ್ಟ್ರ ಪರಿಹಾರದ ಸಾಧ್ಯತೆ ಕ್ಷೀಣಿಸುತ್ತಿದೆ ಎಂದು ಕಳವಳ ವ್ಯಕ್ತಪಡಿಸಿರುವ ಕೆನಡಾ, ಬ್ರಿಟನ್, ಫ್ರಾನ್ಸ್, ಡೆನ್ಮಾರ್ಕ್, ಸ್ಪೇನ್ ಸೇರಿದಂತೆ 12 ರಾಷ್ಟ್ರಗಳು ಜಂಟಿ ರಾಜತಾಂತ್ರಿಕ ಹೇಳಿಕೆ ಬಿಡುಗಡೆ ಮಾಡಿವೆ. ಅಂತರರಾಷ್ಟ್ರೀಯ ಕಾನೂನಿನಡಿ ಅಕ್ರಮವೆಂದು ಪರಿಗಣಿಸಲಾದ ಇಸ್ರೇಲಿ ವಸಾಹತುಗಳಿಂದ ಉತ್ಪಾದನೆಯಾಗುವ ಸರಕುಗಳ ಮೇಲೆ ರಾಷ್ಟ್ರೀಯ ಮಟ್ಟದ ವ್ಯಾಪಾರ ನಿರ್ಬಂಧಗಳನ್ನು ಜಾರಿಗೆ ತರಲು ಅಥವಾ ಯುರೋಪಿಯನ್ ನಿಷೇಧವನ್ನು ಬೆಂಬಲಿಸಲು ಈ ದೇಶಗಳು ತೀರ್ಮಾನಿಸಿವೆ. ಈ ಜಂಟಿ ಪ್ರಕಟಣೆಯಲ್ಲಿ, ಇಸ್ರೇಲ್ ತಕ್ಷಣವೇ ವಸಾಹತು ವಿಸ್ತರಣೆ ಮತ್ತು ಭೂಕಬಳಿಕೆಯನ್ನು ತಡೆಯಬೇಕೆಂದು ಆಗ್ರಹಿಸಲಾಗಿದೆ. ಐರ್ಲೆಂಡ್, ಸ್ಪೇನ್ ಮತ್ತು ಬೆಲ್ಜಿಯಂ ಈಗಾಗಲೇ ಜಾರಿಗೆ ತಂದಿರುವ ಕ್ರಮಗಳನ್ನು ಉಲ್ಲೇಖಿಸಿರುವ ಈ ಒಕ್ಕೂಟವು, ಫಿಲೆಸ್ತೀನ್ ಜನರ ಭೂಮಿಯನ್ನು ಅಕ್ರಮವಾಗಿ ವಶಪಡಿಸಿಕೊಳ್ಳುವುದನ್ನು ತೀವ್ರವಾಗಿ ವಿರೋಧಿಸಿದೆ. ಈ ನಿರ್ಧಾರವು ಮಧ್ಯಪ್ರಾಚ್ಯದಲ್ಲಿ ರಾಜತಾಂತ್ರಿಕ ಶಾಂತಿ ಸ್ಥಾಪನೆಗೆ ಮತ್ತು ಅಂತರರಾಷ್ಟ್ರೀಯ ಕಾನೂನುಗಳ ಜಾರಿಗೆ ಹೊಸ ತಿರುವು ನೀಡಲಿದೆ ಎಂದು ವಿಶ್ಲೇಷಿಸಲಾಗಿದೆ.