ಹಾಲಿವುಡ್‌ ವಾಕ್‌ ಆಫ್‌ ಫೇಮ್‌ನಲ್ಲಿ ನಕ್ಷತ್ರ ಗೌರವ ಪಡೆದ ಮೊದಲ ಫಿಲಿಪೈನ್ಸ್‌ ಗಾಯಕಿ ಲಿಯಾ ಸಲೋಂಗಾ

ಖ್ಯಾತ ಬ್ರಾಡ್‌ವೇ ರಂಗಭೂಮಿ ನಟಿ ಹಾಗೂ ಡಿಸ್ನಿ ಗಾಯಕಿ ಲಿಯಾ ಸಲೋಂಗಾ ಅವರಿಗೆ ೨೦೨೬ರ ಸೆಪ್ಟೆಂಬರ್ ೪ ರಂದು ಹಾಲಿವುಡ್‌ ವಾಕ್‌ ಆಫ್‌ ಫೇಮ್‌ನಲ್ಲಿ ೨,೮೫೫ನೇ ನಕ್ಷತ್ರವನ್ನು ನೀಡಿ ಗೌರವಿಸಲಾಯಿತು. ಲಾಸ್‌ ಏಂಜಲೀಸ್‌ನ ಹಾಲಿವುಡ್ ಬೌಲೆವರ್ಡ್‌ನಲ್ಲಿರುವ ಐತಿಹಾಸಿಕ ಪ್ಯಾಂಟೇಜಸ್ ಥಿಯೇಟರ್ ಎದುರು ನಡೆದ ಕಾರ್ಯಕ್ರಮದಲ್ಲಿ ಈ ನಕ್ಷತ್ರವನ್ನು ಅನಾವರಣಗೊಳಿಸಲಾಯಿತು. ಕಳೆದ ನಾಲ್ಕು ದಶಕಗಳಿಂದ ರಂಗಭೂಮಿ, ಡಿಸ್ನಿ ಆನಿಮೇಷನ್ ಸಿನಿಮಾಗಳು ಹಾಗೂ ಸಂಗೀತ ಕ್ಷೇತ್ರದಲ್ಲಿ ಅವರು ನೀಡಿದ ಅಮೂಲ್ಯ ಕೊಡುಗೆಯನ್ನು ಗುರುತಿಸಿ ಈ ಗೌರವ ನೀಡಲಾಗಿದೆ. ಲೀಸ ಸಲೋಂಗಾ ಅವರು 'ಮಿಸ್ ಸೈಗಾನ್' ಎಂಬ ಜಾಗತಿಕ ಮಟ್ಟದ ಮ್ಯೂಸಿಕಲ್ ನಾಟಕದಲ್ಲಿ ಕಿಮ್ ಪಾತ್ರದಲ್ಲಿ ನಟಿಸಿ 'ಟೋನಿ ಪ್ರಶಸ್ತಿ' ಪಡೆಯುವ ಮೂಲಕ ಜಾಗತಿಕ ಗಮನ ಸೆಳೆದಿದ್ದರು. ಅಲ್ಲದೆ, ಡಿಸ್ನಿಯ ಹಿಟ್ ಆನಿಮೇಟೆಡ್ ಚಿತ್ರಗಳಾದ 'ಅಲಾದಿನ್' ಚಿತ್ರದ ರಾಜಕುಮಾರಿ ಜಾಸ್ಮಿನ್ ಹಾಗೂ 'ಮುಲಾನ್' ಚಿತ್ರದ ಶೀರ್ಷಿಕೆ ಪಾತ್ರಕ್ಕೆ ಗಾಯನ ಧ್ವನಿ ನೀಡುವ ಮೂಲಕ ವಿಶ್ವದಾದ್ಯಂತ ಅಪಾರ ಅಭಿಮಾನಿಗಳನ್ನು ಗಳಿಸಿದ್ದಾರೆ. ತಮ್ಮ ಭಾಷಣದಲ್ಲಿ ಮನಿಲಾದಿಂದ ಪ್ರಾರಂಭವಾದ ತಮ್ಮ ಪಯಣವನ್ನು ಸ್ಮರಿಸಿದ ಅವರು, ಈ ಸಾಧನೆಯು ಏಷ್ಯಾ ಮತ್ತು ಫಿಲಿಪೈನ್ಸ್‌ನ ಮುಂದಿನ ತಲೆಮಾರಿನ ಕಲಾವಿದರಿಗೆ ದೊಡ್ಡ ಪ್ರೇರಣೆಯಾಗಲಿದೆ ಎಂದು ಆಶಯ ವ್ಯಕ್ತಪಡಿಸಿದರು. ಈ ಐತಿಹಾಸಿಕ ಕಾರ್ಯಕ್ರಮದಲ್ಲಿ 'ಮುಲಾನ್' ಚಿತ್ರದ ಪ್ರಮುಖ ಧ್ವನಿ ನಟಿ ಮಿಂಗ್-ನಾ ವೆನ್, ಗಾಯಕಿ ಬ್ರಾಂಡಿ ಹಾಗೂ ನಟ ಡ್ಯಾರನ್ ಕ್ರಿಸ್ ಭಾಗವಹಿಸಿ ಲಿಯಾ ಅವರ ಸಾಧನೆಯನ್ನು ಕೊಂಡಾಡಿದರು. ಹಾಲಿವುಡ್ ವಾಣಿಜ್ಯ ಮಂಡಳಿಯು ಲಿಯಾ ಸಲೋಂಗಾ ಅವರ ಈ ಗೌರವವನ್ನು ಏಷ್ಯನ್ ಕಲಾವಿದರ ಪ್ರಾತಿನಿಧ್ಯಕ್ಕೆ ಸಿಕ್ಕ ಬೃಹತ್ ಮೈಲಿಗಲ್ಲು ಎಂದು ಬಣ್ಣಿಸಿದೆ.