ಮಕ್ಕಳ ಆನ್‌ಲೈನ್ ಸುರಕ್ಷತೆಗೆ ಯುರೋಪಿಯನ್ ಕಮಿಷನ್ ನಿರ್ಧಾರ: 13 ವರ್ಷದೊಳಗಿನ ಮಕ್ಕಳಿಗೆ ಸೋಶಿಯಲ್ ಮೀಡಿಯಾ ನಿಷೇಧಿಸುವ 'ಯೂತ್ ಕಿಡ್ಸ್ ಆಕ್ಟ್' ಪ್ರಸ್ತಾಪ

ಮಕ್ಕಳ ಮೇಲೆ ಸಾಮಾಜಿಕ ಮಾಧ್ಯಮಗಳು ಬೀರುತ್ತಿರುವ ದುಷ್ಪರಿಣಾಮ ಹಾಗೂ ವ್ಯಸನಕಾರಿ ಆಲ್ಗಾರಿದಮ್‌ಗಳನ್ನು ತಡೆಯಲು ಯುರೋಪಿಯನ್ ಕಮಿಷನ್ ಐತಿಹಾಸಿಕ 'ಯುಇಯು ಕಿಡ್ಸ್ ಆಕ್ಟ್' (KIDS Act) ಕರಡು ಮಸೂದೆಯನ್ನು ಪ್ರಸ್ತಾಪಿಸಿದೆ. ಸ್ಟ್ರಾಸ್‌ಬರ್ಗ್‌ನಲ್ಲಿ ನಡೆದ ಸಭೆಯಲ್ಲಿ ಯುರೋಪಿಯನ್ ಕಮಿಷನ್ ಅಧ್ಯಕ್ಷೆ ಉರ್ಸುಲಾ ವಾನ್ ಡೆರ್ ಲೇಯನ್ ಈ ಪ್ರಸ್ತಾವನೆಯನ್ನು ಪ್ರಕಟಿಸಿದ್ದು, ಯುರೋಪಿಯನ್ ಯೂನಿಯನ್‌ನ 27 ಸದಸ್ಯ ರಾಷ್ಟ್ರಗಳಲ್ಲಿ ಮಕ್ಕಳ ಡಿಜಿಟಲ್ ಸುರಕ್ಷತೆಗೆ ಒಂದೇ ರೀತಿಯ ಕಟ್ಟುನಿಟ್ಟಿನ ನಿಯಮಗಳನ್ನು ಜಾರಿಗೆ ತರಲು ಉದ್ದೇಶಿಸಲಾಗಿದೆ. ಈ ನೂತನ ಕರಡು ಕಾಯ್ದೆಯಡಿ, 13 ವರ್ಷಕ್ಕಿಂತ ಕೆಳಗಿನ ಮಕ್ಕಳು ಸಾಮಾಜಿಕ ಮಾಧ್ಯಮ ಮತ್ತು ವಿಡಿಯೋ ಹಂಚಿಕೆ ವೇದಿಕೆಗಳಲ್ಲಿ ಸ್ವತಂತ್ರ ಖಾತೆ ತೆರೆಯುವುದನ್ನು ಸಂಪೂರ್ಣವಾಗಿ ನಿಷೇಧಿಸಲಾಗುತ್ತದೆ. 13 ರಿಂದ 15 ವರ್ಷದೊಳಗಿನ ಹದಿಹರೆಯದ ಮಕ್ಕಳಿಗೆ ಪೋಷಕರ ಸಂಪೂರ್ಣ ನಿಯಂತ್ರಣ ಮತ್ತು ಮೇಲ್ವಿಚಾರಣೆ ಇರುವ ‘ಮಿನಿ ಖಾತೆಗಳಿಗೆ’ ಮಾತ್ರ ಅವಕಾಶ ನೀಡಲಾಗುತ್ತದೆ. 15 ವರ್ಷ ಪೂರೈಸಿದ ನಂತರವಷ್ಟೇ ಯುವಕರು ಸ್ವತಂತ್ರ ಖಾತೆಗಳನ್ನು ತೆರೆಯಬಹುದಾಗಿದ್ದು, 18 ವರ್ಷ ತುಂಬುವವರೆಗೆ ಪ್ಲಾಟ್‌ಫಾರ್ಮ್‌ಗಳು ಅವರ ಸುರಕ್ಷತೆಗೆ ಸೂಕ್ತ ಡಿಜಿಟಲ್ ವಾತಾವರಣವನ್ನು ನಿರ್ಮಿಸಿಕೊಡಬೇಕಾಗುತ್ತದೆ. ಇದರಲ್ಲಿ ಅನ್-ಲಿಮಿಟೆಡ್ ಸ್ಕ್ರೋಲಿಂಗ್, ವ್ಯಸನಕಾರಿ ಗೇಮಿಂಗ್ ಫೀಚರ್‌ಗಳು ಮತ್ತು ಆಟೋಪ್ಲೇಯಂತಹ ವೈಶಿಷ್ಟ್ಯಗಳಿಗೆ ನಿಷೇಧ ಹೇರಲಾಗುತ್ತದೆ. ಈ ಕಾಯ್ದೆಯ ಪ್ರಮುಖ ಅಂಶವೆಂದರೆ, ನಿಯಮ ಪಾಲನೆಯ ಜವಾಬ್ದಾರಿಯನ್ನು ತಂತ್ರಜ್ಞಾನ ಕಂಪನಿಗಳ ಮೇಲೆಯೇ ಹೊರಿಸಲಾಗಿದೆ. ಟೆಕ್ ಕಂಪನಿಗಳು ಮತ್ತು ಎಐ ಚಾಟ್‌ಬಾಟ್‌ಗಳ ತಯಾರಕರು ತಮ್ಮ ಸೇವೆಗಳು ಮಕ್ಕಳಿಗೆ ಸುರಕ್ಷಿತವಾಗಿವೆ ಎಂದು ಸಾಬೀತುಪಡಿಸಬೇಕಾಗುತ್ತದೆ. ವಯಸ್ಸು ಪರಿಶೀಲನೆಯನ್ನು (Age Verification) ಕಡ್ಡಾಯಗೊಳಿಸಲಾಗಿದ್ದು, ಈ ನಿಯಮಗಳನ್ನು ಉಂಲ್ಲಘಿಸುವ ಟೆಕ್ ಸಂಸ್ಥೆಗಳಿಗೆ ಜಾಗತಿಕ ವಹಿವಾಟಿನ ಶೇಕಡಾ 6 ರವರೆಗೆ ಭಾರಿ ದಂಡ ವಿಧಿಸುವ ಎಚ್ಚರಿಕೆಯನ್ನು ನೀಡಲಾಗಿದೆ.