ಪಾರ್ಶ್ವ ಸ್ನಾಯು ಸೆಳೆತ: ಏಷ್ಯನ್ ಗೇಮ್ಸ್‌ನಿಂದ ವರುಣ್ ಚಕ್ರವರ್ತಿ ಔಟ್, ವಿಪ್ರಾಜ್ ನಿಗಮ್‌ಗೆ ಬುಲಾವ್

ಜಪಾನ್‌ನ ಐಚಿ-ನಾಗೋಯಾದಲ್ಲಿ ನಡೆಯಲಿರುವ 2026ರ ಏಷ್ಯನ್ ಗೇಮ್ಸ್‌ಗೆ ಮುನ್ನ ಭಾರತ ಪುರುಷರ ಕ್ರಿಕೆಟ್ ತಂಡಕ್ಕೆ ದೊಡ್ಡ ಗಾಯದ ಆಘಾತ ಎದುರಾಗಿದೆ. ಪಾರ್ಶ್ವ ಸ್ನಾಯುವಿನ ಗಾಯದಿಂದಾಗಿ (ಸೈಡ್ ಸ್ಟ್ರೈನ್) ಭಾರತದ ಪ್ರಮುಖ ರಹಸ್ಯ ಸ್ಪಿನ್ನರ್ ವರುಣ್ ಚಕ್ರವರ್ತಿ ಮುಂಬರುವ ಜಪಾನ್ ವಿರುದ್ಧದ ಟಿ20 ಹಾಗೂ ಏಷ್ಯನ್ ಗೇಮ್ಸ್ ಟೂರ್ನಿಯಿಂದ ಸಂಪೂರ್ಣವಾಗಿ ಹೊರಬಿದ್ದಿದ್ದಾರೆ. ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ (ಬಿಸಿ ಸಿಐ) ಆಯ್ಕೆ ಸಮಿತಿಯು ವರುಣ್ ಅವರ ಬದಲಿಗೆ ದೆಹಲಿ ಕ್ಯಾಪಿಟಲ್ಸ್ ಆಲ್ರೌಂಡರ್ ವಿಪ್ರಾಜ್ ನಿಗಮ್ ಅವರನ್ನು ತಂಡಕ್ಕೆ ಸೇರ್ಪಡೆಗೊಳಿಸಿದೆ. ನವದೆಹಲಿಯಲ್ಲಿ ಅಫ್ಘಾನಿಸ್ತಾನ ವಿರುದ್ಧ ನಡೆದ ಮೊದಲ ಟಿ20 ಪಂದ್ಯದ ವೇಳೆ ಬೌಲಿಂಗ್ ಮಾಡುತ್ತಿದ್ದಾಗ ವರುಣ್ ಚಕ್ರವರ್ತಿ ಹೊಟ್ಟೆಯ ಕೆಳಭಾಗದಲ್ಲಿ ತೀವ್ರ ನೋವು ಅನುಭವಿಸಿದ್ದರು. ಗಾಯದ ನಡುವೆಯೂ ನಾಲ್ಕು ಓವರ್‌ಗಳ ಸ್ಪೆಲ್ ಪೂರ್ಣಗೊಳಿಸಿ 16 ರನ್‌ಗೆ 1 ವಿಕೆಟ್ ಪಡೆದಿದ್ದರೂ, ವೈದ್ಯಕೀಯ ತಪಾಸಣೆಯ ನಂತರ ಗಾಯ ಗಂಭೀರವಾಗಿರುವುದು ದೃಢಪಟ್ಟಿತ್ತು. ಇದರಿಂದಾಗಿ ಅವರು ಸರಣಿಯಿಂದಷ್ಟೇ ಅಲ್ಲದೆ ಏಷ್ಯನ್ ಗೇಮ್ಸ್‌ನಿಂದಲೂ ದೂರ ಉಳಿಯಬೇಕಾಯಿತು. ಇದಲ್ಲದೆ, ಏಷ್ಯನ್ ಗೇಮ್ಸ್ ತಂಡದಲ್ಲಿದ್ದ ಆಲ್ರೌಂಡರ್ ನಿತೀಶ್ ಕುಮಾರ್ ರೆಡ್ಡಿ ಅವರನ್ನು ವೆಸ್ಟ್ ಇಂಡೀಸ್ ವಿರುದ್ಧದ ಮುಂಬರುವ ಏಕದಿನ ಸರಣಿಗೆ ಆಯ್ಕೆ ಮಾಡಲಾಗಿದ್ದು, ಏಷ್ಯನ್ ಗೇಮ್ಸ್ ತಂಡದಿಂದ ಹಿಂಪಡೆಯಲಾಗಿದೆ. ಶ್ರೇಯಸ್ ಅಯ್ಯರ್ ನಾಯಕತ್ವದ ಭಾರತ ಕ್ರಿಕೆಟ್ ತಂಡವು ಸೆಪ್ಟೆಂಬರ್ 28ರಿಂದ ಏಷ್ಯನ್ ಗೇಮ್ಸ್ ಅಂಗಳದಲ್ಲಿ ಶುಭಾರಂಭ ಮಾಡಲಿದ್ದು, ವರುಣ್ ಅವರ ಅನುಪಸ್ಥಿತಿಯಲ್ಲಿ ಯುವ ಸ್ಪಿನ್ನರ್‌ಗಳು ಪ್ರಮುಖ ಪಾತ್ರ ವಹಿಸಬೇಕಾಗಿದೆ.