ಸಬ್ಸಿಡಿ ದರದ ಪಿಜಿ ವೈದ್ಯಕೀಯ ಶಿಕ್ಷಣ ಪಡೆದ ವೈದ್ಯರು ಸರಕಾರಿ ಸೇವಾ ಬಾಂಡ್‌ನಿಂದ ನುಣುಚಿಕೊಳ್ಳುವಂತಿಲ್ಲ: ಅಲಹಾಬಾದ್ ಹೈಕೋರ್ಟ್

ಸರಕಾರಿ ವೈದ್ಯಕೀಯ ಕಾಲೇಜುಗಳಲ್ಲಿ ಭಾರಿ ಸಬ್ಸಿಡಿ ದರದಲ್ಲಿ ಸ್ನಾತಕೋತ್ತರ (ಪಿಜಿ) ವೈದ್ಯಕೀಯ ಶಿಕ್ಷಣ ಪಡೆದ ವೈದ್ಯರು ಕಡ್ಡಾಯ ಸರಕಾರಿ ಸೇವಾ ಬಾಂಡ್ ತೀರಿಸುವುದು ಕಡ್ಡಾಯ ಎಂದು ಅಲಹಾಬಾದ್ ಹೈಕೋರ್ಟ್ ಸ್ಪಷ್ಟಪಡಿಸಿದೆ. ಲಖನೌ ಪೀಠದ ನ್ಯಾಯಮೂರ್ತಿ ಶೇಖರ್ ಬಿ. ಸರಾಫ್ ಮತ್ತು ನ್ಯಾಯಮೂರ್ತಿ ಅವಧೇಶ್ ಕುಮಾರ್ ಚೌಧರಿ ಅವರಿದ್ದ ವಿಭಾಗೀಯ ಪೀಠವು ಈ ತೀರ್ಪು ನೀಡಿದ್ದು, ಸರಕಾರಿ ಆಸ್ಪತ್ರೆಗಳಲ್ಲಿ ವೈದ್ಯರ ಲಭ್ಯತೆಯನ್ನು ಕಾಯ್ದುಕೊಳ್ಳಲು ಹಾಗೂ ಸಾರ್ವಜನಿಕರ ಆರೋಗ್ಯದ ಹಕ್ಕನ್ನು ರಕ್ಷಿಸಲು ಈ ಕಡ್ಡಾಯ ಸೇವೆ ಅಗತ್ಯವಾಗಿದೆ ಎಂದು ಪ್ರತಿಪಾದಿಸಿದೆ. ಸಂಜಯ್ ಗಾಂಧಿ ಸ್ನಾತಕೋತ್ತರ ವೈದ್ಯಕೀಯ ವಿಜ್ಞಾನ ಸಂಸ್ಥೆಯ (SGPGI) ಎಂಡಿ ಪದವೀಧರೆ ಡಾ. ಅಪರೂಪ ಸೇನ್ ಗುಪ್ತಾ ಸಲ್ಲಿಸಿದ್ದ ಅರ್ಜಿಯ ವಿಚಾರಣೆ ವೇಳೆ ನ್ಯಾಯಾಲಯ ಈ ಆದೇಶ ನೀಡಿದೆ. ಕೋರ್ಸ್ ಮುಗಿದ ಮೂರು ತಿಂಗಳೊಳಗೆ ನಿಯೋಜನೆ ನೀಡದ ಕಾರಣ ತಮ್ಮ ಎರಡು ವರ್ಷಗಳ ಬಾಂಡ್ ರದ್ದಾಗಬೇಕು ಎಂದು ಅರ್ಜಿದಾರರು ವಾದಿಸಿದ್ದರು. ಆದರೆ ಈ ವಾದವನ್ನು ತಳ್ಳಾಕಿದ ಹೈಕೋರ್ಟ್, ಆಡಳಿತಾತ್ಮಕ ವಿಳಂಬದಿಂದ ಸೇವಾ ಹೊಣೆಗಾರಿಕೆ ರದ್ದಾಗುವುದಿಲ್ಲ ಎಂದಿದೆ. ಆದಾಗ್ಯೂ, ವೈದ್ಯೆಗೆ ಕೌನ್ಸಿಲಿಂಗ್ ಅವಕಾಶ ನೀಡುವಲ್ಲಿ ಆದ ಲೋಪವನ್ನು ಸರಿಪಡಿಸಲು, ನಾಲ್ಕು ವಾರಗಳೊಳಗೆ ಹೊಸ ಕೌನ್ಸಿಲಿಂಗ್ ನಡೆಸುವಂತೆ ವೈದ್ಯಕೀಯ ಶಿಕ್ಷಣ ಮಹಾನಿರ್ದೇಶಕರಿಗೆ ಸೂಚಿಸಿದೆ.

ಹೆಚ್ಚಿನ ಮಾಹಿತಿಗಾಗಿ, AI Pragati ಗೆ ಭೇಟಿ ನೀಡಿ (www.aipragati.in).