ಭಾರತದಲ್ಲಿ ಅಪ್ಲೈಡ್ ಮೆಟೀರಿಯಲ್ಸ್ ಮತ್ತು ಲ್ಯಾಮ್ ರಿಸರ್ಚ್‌ನಿಂದ $6 ಬಿಲಿಯನ್ ಮೌಲ್ಯದ ಬೃಹತ್ ಸೆಮಿಕಂಡಕ್ಟರ್ ಹೂಡಿಕೆ ಘೋಷಣೆ

ಭಾರತದ ಸೆಮಿಕಂಡಕ್ಟರ್ ಕ್ಷೇತ್ರಕ್ಕೆ ಹೊಸ ಚೈತನ್ಯ ನೀಡುವ ನಿಟ್ಟಿನಲ್ಲಿ, ಚಿಪ್ ತಯಾರಿಕಾ ಉಪಕರಣಗಳ ಜಾಗತಿಕ ಮುಂಚೂಣಿ ಸಂಸ್ಥೆಗಳಾದ ಅಪ್ಲೈಡ್ ಮೆಟೀರಿಯಲ್ಸ್ ಮತ್ತು ಲ್ಯಾಮ್ ರಿಸರ್ಚ್ ಸಂಸ್ಥೆಗಳು ಒಟ್ಟು $6 ಬಿಲಿಯನ್ (ಸುಮಾರು ₹50,000 ಕೋಟಿ) ಮೌಲ್ಯದ ಹೂಡಿಕೆಗಳನ್ನು ಸೆಮಿಕಾನ್ ಇಂಡಿಯಾ 2026 ಶೃಂಗಸಭೆಯಲ್ಲಿ ಘೋಷಿಸಿವೆ. ಅಪ್ಲೈಡ್ ಮೆಟೀರಿಯಲ್ಸ್ ತನ್ನ 'ಇಂಡಿಯಾ ವಿಷನ್ 2035' ಯೋಜನೆಯಡಿ ಮುಂದಿನ ಹತ್ತು ವರ್ಷಗಳಲ್ಲಿ $5 ಬಿಲಿಯನ್ ಹೂಡಿಕೆ ಮಾಡಲಿದ್ದು, ಬೆಂಗಳುರಿನ ಬಳಿ 140 ಎಕರೆ ವಿಸ್ತೀರ್ಣದ ಸುಧಾರಿತ ಸೆಮಿಕಂಡಕ್ಟರ್ ಸಂಶೋಧನಾ ಪಾರ್ಕ್ ನಿರ್ಮಿಸಲಿದೆ. ಈ ಸಂಶೋಧನಾ ಕೇಂದ್ರವು 300mm ವೇಫರ್ ಕ್ಲೀನ್‌ರೂಮ್ ಸೌಲಭ್ಯಗಳು, ಇಂಜಿನಿಯರಿಂಗ್ ಪರಿಣತಿ ಮತ್ತು ಜಾಗತಿಕ ಗ್ರಾಹಕರೊಂದಿಗೆ ಸಹಯೋಗದ ಸಂಶೋಧನೆ ನಡೆಸುವ ಪ್ರಯೋಗಾಲಯಗಳನ್ನು ಹೊಂದಿರಲಿದೆ. ಇನ್ನೊಂದೆಡೆ, ಅಮೆರಿಕ ಮೂಲದ ಲ್ಯಾಮ್ ರಿಸರ್ಚ್ ಕಾರ್ಪೊರೇಷನ್ ಭಾರತದಲ್ಲಿ ₹10,000 ಕೋಟಿ ಹೂಡಿಕೆ ಮಾಡುವುದಾಗಿ ತಿಳಿಸಿದೆ. ಈ ಹೂಡಿಕೆಯ ಮೂಲಕ ಸಂಸ್ಥೆಯು ತನ್ನ ಮೊದಲ ಸಿಲಿಕಾನ್ ಬಿಡಿಭಾಗಗಳ ತಯಾರಿಕಾ ಘಟಕವನ್ನು ಸ್ಥಾಪಿಸಲಿದೆ ಹಾಗೂ ಬೆಂಗಳುರಿನಲ್ಲಿರುವ ತನ್ನ ಸಂಶೋಧನೆ ಮತ್ತು ಅಭಿವೃದ್ಧಿ (R&D) ವಿಭಾಗವನ್ನು ಮತ್ತಷ್ಟು ವಿಸ್ತರಿಸಲಿದೆ. ಈ ಘಟಕವು ಸುಧಾರಿತ ಚಿಪ್ ತಂತ್ರಜ್ಞಾನಕ್ಕೆ ಅಗತ್ಯವಿರುವ ಸಿಲಿಕಾನ್ ಇಂಗಾಟ್ ಸಂಸ್ಕರಣೆಯಂತಹ ಪ್ರಮುಖ ಕಾರ್ಯಗಳನ್ನು ನಿರ್ವಹಿಸಲಿದೆ. ಕೇಂದ್ರ ಸರ್ಕಾರದ ₹1,27,500 ಕೋಟಿ ಮೌಲ್ಯದ 'ಸೆಮಿಕಾನ್ 2.0' ನೀತಿಯ ಭಾಗವಾಗಿ ಈ ಬೃಹತ್ ಹೂಡಿಕೆಗಳು ಬಂದಿವೆ. ಈ ಯೋಜನೆಗಳು ಬೆಂಗಳುರನ್ನು ವಿಶ್ವದ ಪ್ರಮುಖ ಹಾರ್ಡ್‌ವೇರ್, ಚಿಪ್ ಡಿಸೈನ್ ಮತ್ತು ತಂತ್ರಜ್ಞಾನ ಸಂಶೋಧನಾ ಕೇಂದ್ರವಾಗಿ ಮತ್ತಷ್ಟು ಬಲಪಡಿಸಲಿವೆ.