ಅಧಿಕೃತ ಮತ್ತು ಡಿಜಿಟಲ್ ವ್ಯವಸ್ಥೆಗಳಲ್ಲಿ ಭಾರತೀಯ ಪ್ರಮಾಣಿತ ಸಮಯ ಕಡ್ಡಾಯಗೊಳಿಸಿ ಕೇಂದ್ರದಿಂದ ಹೊಸ ಲೀಗಲ್ ಮೆಟ್ರಾಲಜಿ ನಿಯಮಗಳ ಅಧಿಸೂಚನೆ

ಭಾರತ ಸರ್ಕಾರವು ದೇಶದ ಪ್ರತಿಯೊಂದು ಅಧಿಕೃತ, ಶಾಸನಬದ್ಧ ಮತ್ತು ಡಿಜಿಟಲ್ ರಂಗದಲ್ಲಿ ಸಮಯದ ನಿಖರತೆಯನ್ನು ತರಲು 'ಲೀಗಲ್ ಮೆಟ್ರಾಲಜಿ (ಇಂಡಿಯನ್ ಸ್ಟ್ಯಾಂಡರ್ಡ್ ಟೈಮ್) ನಿಯಮಗಳು, 2026' ಅನ್ನು ಅಧಿಕೃತವಾಗಿ ಅಧಿಸೂಚಿಸಿದೆ. ಕೇಂದ್ರ ಗ್ರಾಹಕ ವ್ಯವಹಾರಗಳ ಇಲಾಖೆಯು ಹೊರಡಿಸಿರುವ ಈ ನೂತನ ನಿಯಮಾವಳಿಯ ಪ್ರಕಾರ, ಭಾರತೀಯ ಪ್ರಮಾಣಿತ ಸಮಯವನ್ನು (ಐಎಸ್‌ಟಿ) ದೇಶದಾದ್ಯಂತ ಕಾನೂನು, ಆಡಳಿತ, ವಾಣಿಜ್ಯ ಮತ್ತು ತಾಂತ್ರಿಕ ಪ್ರಕ್ರಿಯೆಗಳಿಗೆ ಏಕೈಕ ಅಧಿಕೃತ ಸಮಯವನ್ನಾಗಿ ಕಡ್ಡಾಯಗೊಳಿಸಲಾಗಿದೆ. ಈ ನಿಯಮಗಳು ಅಧಿಕೃತ ಗ್ಯಾಸೇಟ್‌ನಲ್ಲಿ ಪ್ರಕಟಗೊಂಡ ದಿನಾಂಕದಿಂದ 180 ದಿನಗಳ ನಂತರ ಜಾರಿಗೆ ಬರಲಿವೆ. ಬ್ಯಾಂಕಿಂಗ್ ವ್ಯವಸ್ಥೆಗಳು, ಡಿಜಿಟಲ್ ಪಾವತಿ ವೇದಿಕೆಗಳು, ದೂರಸಂಪರ್ಕ ಜಾಲಗಳು, ವಿದ್ಯುತ್ ಗ್ರಿಡ್‌ಗಳು, ರೈಲ್ವೆ ಹಾಗೂ ವಿಮಾನಯಾನ ಸಾರಿಗೆ ನಿರ್ವಹಣೆ ಮತ್ತು ಸರ್ಕಾರಿ ದಾಖಲೆಗಳ ನಿರ್ವಹಣೆ ಮಾಡುವ ಸಂಸ್ಥೆಗಳಿಗೆ ತಮ್ಮ ತಾಂತ್ರಿಕ ವ್ಯವಸ್ಥೆಗಳನ್ನು ಮಾರ್ಪಡಿಸಿಕೊಳ್ಳಲು ಈ ಸಮಯ ನೀಡಲಾಗಿದೆ. ಪ್ರಸ್ತುತ, ದೇಶದ ಹಲವು ಡಿಜಿಟಲ್ ವ್ಯವಸ್ಥೆಗಳು ವಿದೇಶಿ ಉಪಗ್ರಹ ಆಧಾರಿತ ಸಮಯದ ಮೂಲಗಳನ್ನು ನೆಚ್ಚಿಕೊಂಡಿದ್ದು, ಇವು ಸಣ್ಣ ತಾಂತ್ರಿಕ ವ್ಯತ್ಯಾಸಗಳಿಗೆ ಕಾರಣವಾಗುತ್ತಿದ್ದವು. ಹೊಸ ನಿಯಮಾವಳಿಯಡಿ, ಸಿಎಸ್‌ಐಆರ್-ರಾಷ್ಟ್ರೀಯ ಭೌತಿಕ ಪ್ರಯೋಗಾಲಯ (ಸಿಎಸ್‌ಐಆರ್-ಎನ್‌ಪಿಎಲ್) ಮತ್ತು ಭಾರತದ ಸ್ವದೇಶಿ ಉಪಗ್ರಹ ನೌಕಾಯಾನ ವ್ಯವಸ್ಥೆಯಾದ ನಾವ್-ಐಸಿ (NavIC) ಮೂಲಕ ಭಾರತೀಯ ಸಮಯವನ್ನು ಪ್ರಸರಿಸಲಾಗುತ್ತದೆ. ಇದರಿಂದ ವಿದೇಶಿ ಸಮಯದ ಮೂಲಗಳ ಮೇಲಿನ ಅವಲಂಬನೆ ಕಡಿಮೆಯಾಗಲಿದ್ದು, ದೇಶದ ಡಿಜಿಟಲ್ ಸಾರ್ವಭೌಮತ್ವ ಮತ್ತು ಸೈಬರ್ ಭದ್ರತೆ ಬಲಗೊಳ್ಳಲಿದೆ. 'ಒಂದು ದೇಶ, ಒಂದು ಸಮಯ' ಆಶಯವನ್ನು ಸಾಕಾರಗೊಳಿಸುವಲ್ಲಿ ಈ ಹೆಜ್ಜೆ ನಿರ್ಣಾಯಕ ಎನಿಸಿದೆ.