ಉತ್ತರಾಖಂಡದ ಪಿಥೋರಾಘಡದಲ್ಲಿ ‘ನೊಮ್ಯಾಡಿಕ್ ಎಲಿಫೆಂಟ್ 2026’ ಭಾರತ-ಮಂಗೋಲಿಯಾ ಜಂಟಿ ಸೇನಾ ಅಭ್ಯಾಸ ಆರಂಭ

ಭಾರತ ಮತ್ತು ಮಂಗೋಲಿಯಾ ದೇಶಗಳ ನಡುವಿನ 18ನೇ ಆವೃತ್ತಿಯ ಜಂಟಿ ಸೇನಾ ತರಬೇತಿ ಅಭ್ಯಾಸ ‘ನೊಮ್ಯಾಡಿಕ್ ಎಲಿಫೆಂಟ್ 2026’ ಸೆಪ್ಟೆಂಬರ್ 21 ರಂದು ಉತ್ತರಾಖಂಡದ ಪಿಥೋರಾಘಡದಲ್ಲಿರುವ ವಿದೇಶಿ ತರಬೇತಿ ಕೇಂದ್ರದಲ್ಲಿ ಅಧಿಕೃತವಾಗಿ ಆರಂಭವಾಯಿತು. ಅಕ್ಟೋಬರ್ 3 ರವರೆಗೆ ನಡೆಯಲಿರುವ ಈ ವಾರ್ಷಿಕ ಸೇನಾ ಅಭ್ಯಾಸವನ್ನು ಎರಡೂ ದೇಶಗಳು ಸರದಿಯ ಆಧಾರದಲ್ಲಿ ಆಯೋಜಿಸುತ್ತಾ ಬಂದಿವೆ. ಈ ಬಾರಿಯ ಅಭ್ಯಾಸದಲ್ಲಿ ಭಾರತೀಯ ಸೇನೆ ಮತ್ತು ಮಂಗೋಲಿಯನ್ ಸಶಸ್ತ್ರ ಪಡೆಗಳ ತಲಾ 45 ಯೋಧರು ಭಾಗವಹಿಸುತ್ತಿದ್ದಾರೆ. ವಿಶ್ವಸಂಸ್ಥೆಯ ನಿಯೋಗದಡಿ ಬೆಟ್ಟಗುಡ್ಡ ಹಾಗೂ ಅರೆ-ನಗರ ಪ್ರದೇಶಗಳಲ್ಲಿ ಭಯೋತ್ಪಾದನಾ ನಿಗ್ರಹ ಕಾರ್ಯಾಚರಣೆ ನಡೆಸುವುದು ಈ ತರಬೇತಿಯ ಪ್ರಮುಖ ಉದ್ದೇಶವಾಗಿದೆ. ಕಟ್ಟಡಗಳ ಒಳಗೆ ಶೋಧನೆ, ಹೆಲಿಕಾಪ್ಟರ್ ಮೂಲಕ ಯೋಧರ ಇಳಿಸುವಿಕೆ (Special Heliborne Operations), ಸೈಬರ್ ಭದ್ರತೆ ಮತ್ತು ಆಧುನಿಕ ಡ್ರೋನ್ ಹಾಗೂ ಡ್ರೋನ್ ನಿಗ್ರಹ ತಂತ್ರಜ್ಞಾನಗಳ ಬಳಕೆಯ ಕುರಿತು ಜಂಟಿ ತರಬೇತಿ ನೀಡಲಾಗುತ್ತಿದೆ. ಎರಡೂ ಸೌಹಾರ್ದಯುತ ರಾಷ್ಟ್ರಗಳ ನಡುವಿನ ರಕ್ಷಣಾ ಸಹಕಾರವನ್ನು ಬಲಪಡಿಸಲು ಮತ್ತು ಯುದ್ಧತಂತ್ರಗಳ ಜ್ಞಾನ ವಿನಿಮಯಕ್ಕೆ ‘ನೊಮ್ಯಾಡಿಕ್ ಎಲಿಫೆಂಟ್’ ಅಭ್ಯಾಸವು ಪ್ರಮುಖ ವೇದಿಕೆಯಾಗಿದೆ ಎಂದು ರಕ್ಷಣಾ ಸಚಿವಾಲಯ ತಿಳಿಸಿದೆ. ಇದರ ಕಳೆದ ಆವೃತ್ತಿಯು 2025 ರ ಮೇ-ಜೂನ್‌ನಲ್ಲಿ ಮಂಗೋಲಿಯಾದ ಉಲಾನ್‌ಬಾತರ್‌ನಲ್ಲಿ ನಡೆದಿತ್ತು.