ಕೀನ್ಯಾದಲ್ಲಿ ಅಪಹರಣಕ್ಕೊಳಗಾಗಿದ್ದ ಮೂವರು ಭಾರತೀಯರ ಸುರಕ್ಷಿತ ರಕ್ಷಣೆ: ತಾತನಾಡಿಗೆ ವಾಪಸ್

ಕೀನ್ಯಾ ರಾಜಧಾನಿ ನೈರೋಬಿಗೆ ತಲುಪಿದ ತಕ್ಷಣವೇ ದುಷ್ಕರ್ಮಿಗಳಿಂದ ಅಪಹರಣಕ್ಕೊಳಗಾಗಿದ್ದ ಪಂಜಾಬ್ ಮೂಲದ ಮೂವರು ಭಾರತೀಯ ಪ್ರಜೆಗಳನ್ನು ಸುರಕ್ಷಿತವಾಗಿ ರಕ್ಷಿಸಿ, ಭಾರತಕ್ಕೆ ವಾಪಸ್ ಕಳುಹಿಸಿಕೊಡಲಾಗಿದೆ. ನೈರೋಬಿಯಲ್ಲಿರುವ ಭಾರತೀಯ ಹೈಕಮಿಷನ್ ಮತ್ತು ಕೀನ್ಯಾದ ಅಪರಾಧ ತನಿಖಾ ನಿರ್ದೇಶನಾಲಯ (ಡಿಸಿಐ) ಜಂಟಿಯಾಗಿ ನಡೆಸಿದ ಕಾರ್ಯಾಚರಣೆಯ ಫಲವಾಗಿ ಈ ಯಶಸ್ಸು ಸಿಕ್ಕಿದೆ. ಸಂತ್ರಸ್ತರು ಆಗಸ್ಟ್ 5 ರಂದು ನೈರೋಬಿಯ ಜೋಮೊ ಕೆನ್ಯಾಟ್ಟಾ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ತಲುಪಿದ ಬೆನ್ನಲ್ಲೇ ಕಿಯಾಂಬು ಕೌಂಟಿಯ ರಹಸ್ಯ ಸ್ಥಳವೊಂದಕ್ಕೆ ಅಪಹರಿಸಲ್ಪಟ್ಟಿದ್ದರು. ರಹಸ್ಯ ಮಾಹಿತಿ ಮತ್ತು ತಾಂತ್ರಿಕ ತನಿಖೆಯನ್ನು ಆಧಾರಿಸಿ ಕೀನ್ಯಾ ಪೊಲೀಸರು ದಾಳಿ ನಡೆಸಿ ಮೂವರನ್ನು ಸುರಕ್ಷಿತವಾಗಿ ಬಿಡುಗಡೆಗೊಳಿಸಿದರು. ಈ ಮಾನವ ಕಳ್ಳಸಾಗಣೆ ಮತ್ತು ಸುಲಿಗೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಒಬ್ಬ ಭಾರತೀಯ, ಇಬ್ಬರು ಪಾಕಿಸ್ತಾನಿಯರು ಮತ್ತು ಇಬ್ಬರು ಸ್ಥಳೀಯರು ಸೇರಿದಂತೆ ಆರು ಮಂದಿ ಆರೋಪಿಗಳನ್ನು ಪೊಲೀಸರು ಬಂಧಿಸಿದ್ದಾರೆ. ಕೀನ್ಯಾ ಭದ್ರತಾ ಪಡೆಗಳ ಶೀಘ್ರ ಕಾರ್ಯಾಚರಣೆಯನ್ನು ಶ್ಲಾಘಿಸಿರುವ ಭಾರತೀಯ ಹೈಕಮಿಷನ್, ಮೂವರನ್ನೂ ಪಂಜಾಬ್‌ನಲ್ಲಿರುವ ಅವರ ಕುಟುಂಬಸ್ಥರ ಬಳಿಗೆ ಸುರಕ್ಷಿತವಾಗಿ ತಲುಪಿಸಿದೆ.