ಡಿಕ್ರಾ ಡಿಜಿಟಲ್ ಪ್ಲಾಟ್‌ಫಾರ್ಮ್‌ನಲ್ಲಿ ಹವಾಮಾನ ಮಾಹಿತಿ: ನಬಾರ್ಡ್ ಮತ್ತು ಐಎಂಡಿ ನಡುವೆ ಪ್ರಮುಖ ಒಪ್ಪಂದ

ರಾಷ್ಟ್ರೀಯ ಕೃಷಿ ಮತ್ತು ಗ್ರಾಮೀಣ ಅಭಿವೃದ್ಧಿ ಬ್ಯಾಂಕ್ (ನಬಾರ್ಡ್) ಹಾಗೂ ಭಾರತೀಯ ಹವಾಮಾನ ಇಲಾಖೆ (ಐಎಂಡಿ) ಕೃಷಿ ಕ್ಷೇತ್ರದಲ್ಲಿ ಡಿಜಿಟಲ್ ತಂತ್ರಜ್ಞಾನವನ್ನು ವಿಸ್ತರಿಸುವ ನಿಟ್ಟಿನಲ್ಲಿ ಪ್ರಮುಖ ತಿಳುವಳಿಕಾ ಒಪ್ಪಂದಕ್ಕೆ (MoU) ಸಹಿ ಹಾಕಿವೆ. ಈ ಸಹಭಾಗಿತ್ವದ ಅಡಿಯಲ್ಲಿ, ಐಎಂಡಿಯ ಅತ್ಯಾಧುನಿಕ ಹವಾಮಾನ ಸಂಬಂಧಿತ ದತ್ತಾಂಶಗಳನ್ನು ಯುನೈಟೆಡ್ ನೇಷನ್ಸ್ ಡೆವಲಪ್‌ಮೆಂಟ್ ಪ್ರೋಗ್ರಾಂ (ಯುಎನ್‌ಡಿಪಿ) ಮತ್ತು ನಬಾರ್ಡ್ ಬೆಂಬಲಿತ 'ಡಿಕ್ರಾ' (ಡೇಟಾ ಇನ್ ಕ್ಲೈಮೇಟ್ ರೆಸಿಲಿಯಂಟ್ ಅಗ್ರಿಕಲ್ಚರ್) ಡಿಜಿಟಲ್ ಪ್ಲಾಟ್‌ಫಾರ್ಮ್‌ನಲ್ಲಿ ಸಂಯೋಜಿಸಲಾಗುತ್ತದೆ. ಈ ನೂತನ ವ್ಯವಸ್ಥೆಯ ಮೂಲಕ, ತಾಲ್ಲೂಕು ಮತ್ತು ಜಿಲ್ಲಾ ಮಟ್ಟದ ಹವಾಮಾನ ಮುನ್ಸೂಚನೆಗಳು, ಹವಾಮಾನ ಮುನ್ನೆಚ್ಚರಿಕೆಗಳು ಹಾಗೂ ಸ್ಥಳೀಯ ಕೃಷಿ ಸಲಹೆಗಳು 'ಡಿಕ್ರಾ' ಪ್ಲಾಟ್‌ಫಾರ್ಮ್‌ನ ವಿಶೇಷ ಹವಾಮಾನ ಪೋರ್ಟಲ್‌ನಲ್ಲಿ ಮುಕ್ತವಾಗಿ ಲಭ್ಯವಾಗಲಿವೆ. ಉಪಗ್ರಹ ಆಧಾರಿತ ಭೂಮಾಹಿತಿ, ಮಣ್ಣಿನ ತೇವಾಂಶ, ಬೆಳೆಗಳ ಆರೋಗ್ಯ ಮತ್ತು ವಾಯುಗುಣ ವೈಪರೀತ್ಯದ ಅಪಾಯಗಳನ್ನು ಒಳಗೊಂಡಿರುವ 'ಡಿಕ್ರಾ'ದ ಅಸ್ತಿತ್ವದಲ್ಲಿರುವ ದತ್ತಾಂಶಗಳೊಂದಿಗೆ ಐಎಂಡಿಯ ಮಾಹಿತಿ ಸಂಯೋಜನೆಗೊಳ್ಳಲಿದ್ದು, ಕೃಷಿಕರಿಗೆ ನಿಖರ ನಿರ್ಧಾರ ತೆಗೆದುಕೊಳ್ಳಲು ಸಹಾಯ ಮಾಡುತ್ತದೆ. ಒಪ್ಪಂದ ಕಾರ್ಯಕ್ರಮದಲ್ಲಿ ಮಾತನಾಡಿದ ನಬಾರ್ಡ್ ಅಧ್ಯಕ್ಷ ಡಾ. ಶಾಜಿ ಕೃಷ್ಣನ್ ವಿ. ಮತ್ತು ಐಎಂಡಿ ಮಹಾನಿರ್ದೇಶಕ ಡಾ. ಮೃತ್ಯುಂಜಯ ಮೊಹಾಪಾತ್ರ, ವಾಯುಗುಣ ವೈಪರೀತ್ಯದಿಂದ ಬೆಳೆಗಳಿಗೆ ಉಂಟಾಗುವ ನಷ್ಟವನ್ನು ಕಡಿಮೆ ಮಾಡಲು ಮತ್ತು ಗ್ರಾಮೀಣ ಆರ್ಥಿಕತೆಯನ್ನು ಬಲಪಡಿಸಲು ಈ ತಾಂತ್ರಿಕ ಸಹಯೋಗ ಅತ್ಯಗತ್ಯ ಎಂದು ತಿಳಿಸಿದರು. ಈ ತಂತ್ರಜ್ಞಾನವು ಸಣ್ಣ ಮತ್ತು ಅಂಚಿನ ರೈತರಿಗೆ ಮುಕ್ತವಾಗಿ ಲಭ್ಯವಾಗಲಿದ್ದು, ಆಡಳಿತಗಾರರು ಮತ್ತು ಹಣಕಾಸು ಸಂಸ್ಥೆಗಳಿಗೂ ನೆರವಾಗಲಿದೆ.