ಮುಂಬೈನ ಅಪನಿಕ್ 62 ಸಮಾವೇಶದಲ್ಲಿ ನಿಕ್ಸಿ ಮತ್ತು ಅಪನಿಕ್ ಒಪ್ಪಂದ: ಇಂಟರ್ನೆಟ್ ಮೂಲಸೌಕರ್ಯ ಹಾಗೂ ರೂಟಿಂಗ್ ಭದ್ರತೆ ಬಲವರ್ಧನೆ

ನ್ಯಾಷನಲ್ ಇಂಟರ್ನೆಟ್ ಎಕ್ಸ್‌ಚೇಂಜ್ ಆಫ್ ಇಂಡಿಯಾ (ನಿಕ್ಸಿ) ಮತ್ತು ಏಷ್ಯಾ ಪೆಸಿಫಿಕ್ ನೆಟ್‌ವರ್ಕ್ ಇನ್ಫಾರ್ಮೇಷನ್ ಸೆಂಟರ್ (ಅಪನಿಕ್) ಸೆಪ್ಟೆಂಬರ್ 8, 2026 ರಂದು ಮುಂಬೈನಲ್ಲಿ ನಡೆದ ಅಪನಿಕ್ 62 ಶೃಂಗಸಭೆಯಲ್ಲಿ ಮಹತ್ವದ ತಿಳಿವಳಿಕೆ ಒಪ್ಪಂದಕ್ಕೆ (MoU) ಸಹಿ ಹಾಕಿವೆ. ದೇಶದ ಇಂಟರ್ನೆಟ್ ಮೂಲಸೌಕರ್ಯದ ಭದ್ರತೆ, ಸ್ಥಿತಿಸ್ಥಾಪಕತ್ವ ಹಾಗೂ ಕಾರ್ಯಾಚರಣೆಯ ಸಾಮರ್ಥ್ಯವನ್ನು ಹೆಚ್ಚಿಸುವ ನಿಟ್ಟಿನಲ್ಲಿ ಈ ಒಪ್ಪಂದ ಮಾಡಿಕೊಳ್ಳಲಾಗಿದೆ. ಕೇಂದ್ರ ಇಲೆಕ್ಟ್ರಾನಿಕ್ಸ್ ಮತ್ತು ಮಾಹಿತಿ ತಂತ್ರಜ್ಞಾನ ಸಚಿವಾಲಯದ (MeitY) ಜಂಟಿ ಕಾರ್ಯದರ್ಶಿ ಸುಶೀಲ್ ಪಾಲ್ ಅವರ ಸಮ್ಮುಖದಲ್ಲಿ ನಿಕ್ಸಿ ಸಿಇಒ ಡಾ. ದೇವೇಶ್ತ್ಯಾಗಿ ಹಾಗೂ ಅಪನಿಕ್ ಡೈರೆಕ್ಟರ್ ಜನರಲ್ ಜಿಯಾ ರಾಂಗ್ ಲೋ ಅವರು ಒಪ್ಪಂದಕ್ಕೆ ಸಹಿ ಹಾಕಿದರು. ಈ ಒಪ್ಪಂದದ ಪ್ರಕಾರ, ಭಾರತದ ನೆಟ್‌ವರ್ಕ್ ಆಪರೇಟರ್‌ಗಳು ಮತ್ತು ಉದ್ಯಮಗಳಲ್ಲಿ ಇಂಟರ್ನೆಟ್ ಪ್ರೋಟೋಕಾಲ್ ಆವೃತ್ತಿ 6 (IPv6) ಮತ್ತು ರಿಸೋರ್ಸ್ ಪಬ್ಲಿಕ್ ಕೀ ಇನ್‌ಫ್ರಾಸ್ಟ್ರಕ್ಚರ್ (RPKI) ತಂತ್ರಜ್ಞಾನಗಳ ಅಳವಡಿಕೆಯನ್ನು ಉತ್ತೇಜಿಸಲು ಉಭಯ ಸಂಸ್ಥೆಗಳು ಜಂಟಿಯಾಗಿ ಕಾರ್ಯನಿರ್ವಹಿಸಲಿವೆ. ಇದಲ್ಲದೆ, ನಿಕ್ಸಿ ಉಸ್ತುವಾರಿಯಲ್ಲಿ ಭಾರತದಲ್ಲೇ ಸ್ವದೇಶಿ ಆರ್‌ಪಿಕೆಐ ರೆಪೊಸಿಟರಿ ಮಿರರ್ ಸರ್ವರ್ ಅನ್ನು ಸ್ಥಾಪಿಸಲಾಗುತ್ತಿದೆ. ದೇಶದಲ್ಲೇ ಆರ್‌ಪಿಕೆಐ ಸರ್ವರ್ ಸ್ಥಾಪನೆಯಾಗುವುದರಿಂದ ಭಾರತೀಯ ಇಂಟರ್ನೆಟ್ ಸೇವಾದಾರರು ಸ್ಥಳೀಯವಾಗಿಯೇ ಐಪಿ ವಿಳಾಸಗಳನ್ನು ಪರಿಶೀಲಿಸಲು ಸಾಧ್ಯವಾಗುತ್ತದೆ. ಇದರಿಂದ ಇಂಟರ್ನೆಟ್ ವೇಗ ಹೆಚ್ಚುವುದಲ್ಲದೆ, ನೆಟ್‌ವರ್ಕ್ ಹೈಜಾಕಿಂಗ್ ಮತ್ತು ರೂಟಿಂಗ್ ದೋಷಗಳಿಂದ ಡಿಜಿಟಲ್ ಮೂಲಸೌಕರ್ಯಕ್ಕೆ ಪೂರ್ಣ ಭದ್ರತೆ ದೊರೆಯಲಿದೆ. ತಾಂತ್ರಿಕ ತರಬೇತಿ ಹಾಗೂ ಲ್ಯಾಬ್ ಮೂಲಸೌಕರ್ಯ ವೃದ್ಧಿಗೂ ಈ ಒಪ್ಪಂದ ಒತ್ತು ನೀಡಿದ್ದು, ಭಾರತದ ಡಿಜಿಟಲ್ ಕ್ಷೇತ್ರಕ್ಕೆ ಇದು ದೊಡ್ಡ ಬೆಂಬಲ ನೀಡಲಿದೆ.