ಸ್ಯಾಮ್‌ಸಂಗ್‌ನಿಂದ ತಲ 4,000 MB/s ವೇಗದ P9 ಮತ್ತು P7 USB4 ಪೋರ್ಟಬಲ್ SSD ಗ್ಯಾಜೆಟ್‌ಗಳು ಬಿಡುಗಡೆ

ಜಾಗತಿಕ ತಂತ್ರಜ್ಞಾನ ದೈತ್ಯ ಸ್ಯಾಮ್‌ಸಂಗ್ ಎಲೆಕ್ಟ್ರಾನಿಕ್ಸ್ ತನ್ನ ಮುಂದಿನ ತಲೆಮಾರಿನ ಬಾಹ್ಯ ಸಂಗ್ರಹಣಾ ಗ್ಯಾಜೆಟ್‌ಗಳಾದ ಪೋರ್ಟಬಲ್ ಎಸ್‌ಎಸ್‌ಡಿ P9 ಮತ್ತು P7 ಸಾಧನಗಳನ್ನು ಜಾಗತಿಕ ಮಾರುಕಟ್ಟೆಗೆ ಪರಿಚಯಿಸಿದೆ. ಹೊಸ ತಲೆಮಾರಿನ USB4 (40Gbps) ತಂತ್ರಜ್ಞಾನವನ್ನು ಹೊಂದಿರುವ ಈ ಸಾಧನಗಳು, ಕಂಪನಿಯ ಹಿಂದಿನ T-ಸರಣಿಯ ಎಸ್‌ಎಸ್‌ಡಿಗಳಿಗಿಂತ ದುಪ್ಪಟ್ಟು ವೇಗದ ಡೇಟಾ ವರ್ಗಾವಣೆಯನ್ನು ಒದಗಿಸುತ್ತವೆ. ಜರ್ಮನಿಯ ಕಲೋನ್‌ನಲ್ಲಿ ನಡೆದ ಗೇಮ್ಸ್‌ಕಾಮ್ 2026 ಜಾಗತಿಕ ಕಾರ್ಯಕ್ರಮದಲ್ಲಿ ಪ್ರದರ್ಶಿಸಲಾದ ಈ ಗ್ಯಾಜೆಟ್‌ಗಳು ಆಗಸ್ಟ್ 31 ರಿಂದ ಸಾರ್ವಜನಿಕ ಮಾರಾಟಕ್ಕೆ ಲಭ್ಯವಾಗಿವೆ. ಫ್ಲ್ಯಾಗ್‌ಶಿಪ್ ಮಾಡೆಲ್ ಆಗಿರುವ ಪೋರ್ಟಬಲ್ ಎಸ್‌ಎಸ್‌ಡಿ P9 ಸಾಧನವು ಸೆಕೆಂಡಿಗೆ ಗರಿಷ್ಠ 4,000 MB/s ರೀಡ್ (Read) ಹಾಗೂ 3,800 MB/s ರೈಟ್ (Write) ವೇಗವನ್ನು ನೀಡುತ್ತದೆ. ಇದು ವೃತ್ತಿಪರ ವೀಡಿಯೋಗ್ರಾಫರ್‌ಗಳು, ಛಾಯಾಗ್ರಾಹಕರು ಮತ್ತು ಕಂಟೆಂಟ್ ಕ್ರಿಯೇಟರ್‌ಗಳ ಕೆಲಸದ ಒತ್ತಡವನ್ನು ಗಮನಾರ್ಹವಾಗಿ ಕಡಿಮೆ ಮಾಡುತ್ತದೆ. ಈ ವೇಗದ ಸಾಧನವು ನೇರವಾಗಿ 12K RAW ವೀಡಿಯೊ ರೆಕಾರ್ಡಿಂಗ್‌ ಮಾಡಲು ಅತ್ಯುತ್ತಮ ಬೆಂಬಲ ನೀಡುತ್ತದೆ. ಅಲ್ಲದೆ, ಸ್ಯಾಮ್‌ಸಂಗ್ ಪ್ರಕಾರ, ಇದು 4,000 MB/s ವೇಗ ಬೆಂಬಲಿಸುವ ವಿಶ್ವದ ಮೊದಲ 8TB USB4 ಪೋರ್ಟಬಲ್ ಎಸ್‌ಎಸ್‌ಡಿ ಆಗಿದೆ. ಇದರೊಂದಿಗೆ ದೈನಂದಿನ ಬಳಕೆದಾರರು, ಗೇಮರ್‌ಗಳು ಮತ್ತು ಪ್ರಯಾಣಿಕರಿಗಾಗಿ ಸ್ಯಾಮ್‌ಸಂಗ್ 'P7' ಮಾಡೆಲ್ ಅನ್ನು ಸಹ ಬಿಡುಗಡೆ ಮಾಡಿದೆ. ಎರಡು ಮೀಟರ್ ಎತ್ತರದಿಂದ ಬಿದ್ದರೂ ಹಾನಿಯಾಗದಂತಹ ಗಟ್ಟಿಮುಟ್ಟಾದ ವಿನ್ಯಾಸವನ್ನು ಹೊಂದಿರುವ P7, ಲ್ಯಾಪ್‌ಟಾಪ್‌ಗಳು, ಸ್ಮಾರ್ಟ್‌ಫೋನ್‌ಗಳು, ಕ್ಯಾಮೆರಾಗಳು ಮತ್ತು ಗೇಮಿಂಗ್ ಕನ್ಸೋಲ್‌ಗಳೊಂದಿಗೆ ಸುಲಭವಾಗಿ ಸಂಪರ್ಕಗೊಳ್ಳುತ್ತದೆ. 1TB ಯಿಂದ 8TB ವರೆಗಿನ ಸಂಗ್ರಹಣಾ ಆಯ್ಕೆಗಳಲ್ಲಿ ದೊರೆಯುವ ಈ ಹೊಸ ಗ್ಯಾಜೆಟ್‌ಗಳು ಗ್ರಾಹಕರಿಗೆ ಅತ್ಯಂತ ವೇಗದ ಹಾಗೂ ನಂಬಿಕಸ್ಥ ಡೇಟಾ ಸಂಗ್ರಹಣೆಯ ಅನುಭವವನ್ನು ನೀಡಲಿವೆ.