IFA 2026: ಸ್ಯಾಮ್‌ಸಂಗ್‌ನಿಂದ ಎಐ ಆಧಾರಿತ 'ಕಂಪ್ಯಾನಿಯನ್ ಟು ಎಐ ಲಿವಿಂಗ್' ತಂತ್ರಜ್ಞಾನ ಅನಾವರಣ

ಬರ್ಲಿನ್‌ನಲ್ಲಿ ನಡೆಯುತ್ತಿರುವ IFA 2026 ಜಾಗತಿಕ ತಂತ್ರಜ್ಞಾನ ಪ್ರದರ್ಶನದ ಅಂಗವಾಗಿ ಸ್ಯಾಮ್‌ಸಂಗ್ ಎಲೆಕ್ಟ್ರಾನಿಕ್ಸ್ ತನ್ನ 'ಕಂಪ್ಯಾನಿಯನ್ ಟು ಎಐ ಲಿವಿಂಗ್' (AI ಆಧರಿತ ಜೀವನ ಶೈಲಿ) ಕಾರ್ಯತಂತ್ರವನ್ನು ಜಾಗತಿಕವಾಗಿ ಅನಾವರಣಗೊಳಿಸಿದೆ. ಬರ್ಲಿನ್‌ನ ಹಂಬೋಲ್ಟ್ ಕ್ಯಾರೆನಲ್ಲಿ ಆಯೋಜಿಸಲಾದ 'ಸ್ಯಾಮ್‌ಸಂಗ್ ಕನೆಕ್ಟ್' ವಿಶೇಷ ಪ್ರದರ್ಶನದಲ್ಲಿ, ಗ್ರಾಹಕರ ದೈನಂದಿನ ಅಗತ್ಯಗಳಿಗೆ ನೆರವಾಗುವ ಕೃತಕ ಬುದ್ಧಿಮತ್ತೆ (AI) ಆಧಾರಿತ ಸ್ಮಾರ್ಟ್ ಗೃಹ ಉಪಕರಣಗಳು, ಡಿಸ್ಪ್ಲೇ ತಂತ್ರಜ್ಞಾನಗಳು ಹಾಗೂ ಮೊಬೈಲ್ ಸಾಧನಗಳನ್ನು ಕಂಪನಿ ಪ್ರದರ್ಶಿಸಿದೆ. ಈ ಪ್ರದರ್ಶನದಲ್ಲಿ ಸ್ಯಾಮ್‌ಸಂಗ್ ಹೊಸ 'ಬಿಸ್ಪೋಕ್ ಎಐ ವಾಷರ್' ವಾಷಿಂಗ್ ಮೆಷಿನ್ ಶ್ರೇಣಿಯನ್ನು ಪ್ರಮುಖವಾಗಿ ಪರಿಚಯಿಸಿತು. ಇವು ಯುರೋಪಿಯನ್ ಯೂನಿಯನ್‌ನ 'ಕ್ಲಾಸ್ ಎ' ವಿದ್ಯುತ್ ಉಳಿತಾಯ ಮಾನದಂಡಕ್ಕಿಂತ ಶೇಕಡಾ 70 ರಷ್ಟು ಕಡಿಮೆ ವಿದ್ಯುತ್ ಬಳಸುವ ಸಾಮರ್ಥ್ಯ ಹೊಂದಿದ್ದು, ಮನೆಗಳಿಗೆ ಹೊಂದುವ ಆಧುನಿಕ ಫ್ಲಾಟ್ ವಿನ್ಯಾಸವನ್ನು ಹೊಂದಿವೆ. ಇದರ ಜೊತೆಗೆ ಮುಂದಿನ ಪೀಳಿಗೆಯ 'ಮೈಕ್ರೋ ಆರ್‌ಜಿಬಿ' ಟಿವಿ ಡಿಸ್ಪ್ಲೇ ತಂತ್ರಜ್ಞಾನ ಮತ್ತು 'ವಿಷನ್ ಎಐ ಕಂಪ್ಯಾನಿಯನ್' ವೈಶಿಷ್ಟ್ಯಗಳನ್ನು ಪರಿಚಯಿಸಲಾಗಿದೆ. ಇದರಿಂದ ಬಳಕೆದಾರರು ತಮ್ಮ ಸ್ಮಾರ್ಟ್ ಟಿವಿಗಳೊಂದಿಗೆ ನೇರವಾಗಿ ಸಂಭಾಷಣೆ ನಡೆಸಲು ಸಾಧ್ಯವಾಗುತ್ತದೆ. ಇನ್ನು ಕಂಪ್ಯೂಟಿಂಗ್ ಕ್ಷೇತ್ರದಲ್ಲಿ ಹೊಸ ಗ್ಯಾಲಕ್ಸಿ ಬುಕ್6 ಸರಣಿ, ಗ್ಯಾಲಕ್ಸಿ ಎಸ್26 ಎಫ್‌ಇ ಸ್ಮಾರ್ಟ್‌ಫೋನ್ ಹಾಗೂ ಅತ್ಯಾಧುನಿಕ ಒಡಿಸ್ಸಿ ಗೇಮಿಂಗ್ ಮಾನಿಟರ್‌ಗಳನ್ನು ಅನಾವರಣಗೊಳಿಸಲಾಗಿದೆ. ಸ್ಯಾಮ್‌ಸಂಗ್ ಯುರೋಪ್‌ನ ಮುಖ್ಯ ಮಾರ್ಕೆಟಿಂಗ್ ಅಧಿಕಾರಿ ಬೆಂಜಮಿನ್ ಬ್ರಾನ್ ಮಾತನಾಡಿ, "ಎಐ ತಂತ್ರಜ್ಞಾನವು ಕೇವಲ ಆಕರ್ಷಣೆಗೆ ಸೀಮಿತವಾಗದೆ ಗ್ರಾಹಕರ ವಿದ್ಯುತ್ ವೆಚ್ಚ ತಗ್ಗಿಸುವುದು, ಗೃಹ ಯಾಂತ್ರೀಕರಣವನ್ನು ಸರಳಗೊಳಿಸುವುದು ಹಾಗೂ ಶಕ್ತಿಯುತ ವೈಯಕ್ತಿಕ ಅನುಭವ ನೀಡುವುದರ ಮೂಲಕ ದೈನಂದಿನ ಜೀವನದಲ್ಲಿ ಸಕಾರಾತ್ಮಕ ಬದಲಾವಣೆ ತರಬೇಕು" ಎಂದು ಹೇಳಿದರು. ಐಎಫ್‌ಎ 2026 ಜಾಗತಿಕ ಸಮ್ಮೇಳನದಲ್ಲಿ ಸ್ಯಾಮ್‌ಸಂಗ್‌ನ ಈ ಹೊಸ ತಂತ್ರಜ್ಞಾನಗಳು ಕೃತಕ ಬುದ್ಧಿಮತ್ತೆಯು ದೈನಂದಿನ ಜೀವನಶೈಲಿಯನ್ನು ಹೇಗೆ ಸುಲಭಗೊಳಿಸುತ್ತಿದೆ ಎಂಬುದನ್ನು ಸ್ಪಷ್ಟಪಡಿಸಿವೆ.