ಹೈದರಾಬಾದ್‌ನಲ್ಲಿ ₹70,000 ಕೋಟಿ ವೆಚ್ಚದ 1 ಜಿಗಾವಾಟ್ ಎಐ ಡೇಟಾ ಸೆಂಟರ್ ನಿರ್ಮಿಸಲಿದೆ ಟಿಸಿಎಸ್ ಸಂಸ್ಥೆಯ ಹೈಪರ್‌ವಾಲ್ಟ್

ಭಾರತದ ಕೃತಕ ಬುದ್ಧಿಮತ್ತೆ (ಎಐ) ಮೂಲಸೌಕರ್ಯ ಕ್ಷೇತ್ರಕ್ಕೆ ದೊಡ್ಡ ಮಟ್ಟದ ಉತ್ತೇಜನ ನೀಡುವ ನಿಟ್ಟಿನಲ್ಲಿ, ಪ್ರಮುಖ ಐಟಿ ಸಂಸ್ಥೆ ಟಾಟಾ ಕನ್ಸಲ್ಟೆನ್ಸಿ ಸರ್ವಿಸಸ್ (ಟಿಸಿಎಸ್) ನ ಅಂಗಸಂಸ್ಥೆಯಾದ 'ಹೈಪರ್‌ವಾಲ್ಟ್' ತೆಲಂಗಾಣದ ಹೈದರಾಬಾದ್‌ನಲ್ಲಿ 1 ಜಿಗಾವಾಟ್ (GW) ಸಾಮರ್ಥ್ಯದ ದೈತ್ಯ ಎಐ ಡೇಟಾ ಸೆಂಟರ್ ಕ್ಯಾಂಪಸ್ ನಿರ್ಮಿಸುವುದಾಗಿ ಘೋಷಿಸಿದೆ. ಹೈಪರ್‌ವಾಲ್ಟ್ ಮತ್ತು ಅದರ ಪಾಲುದಾರ ಸಂಸ್ಥೆಗಳು ಸೇರಿ ಸುಮಾರು ₹70,000 ಕೋಟಿ (7.41 ಬಿಲಿಯನ್ ಡಾಲರ್) ಹೂಡಿಕೆ ಮಾಡಲಿರುವ ಈ ಯೋಜನೆಗಾಗಿ 264 ಎಕರೆ ಜಾಗವನ್ನು ಈಗಾಗಲೇ ಕಾಯ್ದಿರಿಸಲಾಗಿದೆ. ಈ ಸುಧಾರಿತ ಕ್ಯಾಂಪಸ್ ಅನ್ನು ಎಐ ರಂಗದ ಪ್ರಮುಖ ಕಂಪನಿಗಳು ಮತ್ತು ಜಾಗತಿಕ ಹೈಪರ್‌ಸ್ಕೇಲರ್‌ಗಳ ಅಗತ್ಯಗಳನ್ನು ಪೂರೈಸಲು ಪ್ರತ್ಯೇಕವಾಗಿ ವಿನ್ಯಾಸಗೊಳಿಸಲಾಗಿದೆ. ಬೃಹತ್ ಎಐ ಮಾದರಿಗಳ ತರಬೇತಿ ಮತ್ತು ಕಾರ್ಯಾಚರಣೆಗೆ ಅತ್ಯಗತ್ಯವಾಗಿರುವ ಹೈ-ಡೆನ್ಸಿಟಿ ಲಿಕ್ವಿಡ್-ಕೂಲ್ಡ್ ಕಂಪ್ಯೂಟಿಂಗ್ ಮೂಲಸೌಕರ್ಯವನ್ನು ಇದು ಒಳಗೊಂಡಿರಲಿದೆ. ಹಂತ ಹಂತವಾಗಿ ಅಭಿವೃದ್ಧಿಪಡಿಸಲಾಗುವ ಈ ಡೇಟಾ ಸೆಂಟರ್, ಸಂಪೂರ್ಣವಾಗಿ ಸಿದ್ಧಗೊಂಡಾಗ ಭಾರತದ ಅತಿದೊಡ್ಡ ಮತ್ತು ಅತ್ಯಂತ ಸುಧಾರಿತ ಎಐ ಮೂಲಸೌಕರ್ಯ ಕೇಂದ್ರಗಳಲ್ಲಿ ಒಂದಾಗಲಿದೆ. ಈ ಒಪ್ಪಂದವನ್ನು "ಐತಿಹಾಸಿಕ" ಎಂದು ಬಣ್ಣಿಸಿರುವ ತೆಲಂಗಾಣ ಮುಖ್ಯಮಂತ್ರಿ ಎ. ರೇವಂತ್ ರೆಡ್ಡಿ, ಬೃಹತ್ ಮಟ್ಟದ ಕಂಪ್ಯೂಟಿಂಗ್ ಮೂಲಸೌಕರ್ಯವನ್ನು ಹೊಂದುವುದರಿಂದ ಹೈದರಾಬಾದ್ ಜಾಗತಿಕ ಎಐ ಕ್ರಾಂತಿಯ ಮುಂಚೂಣಿಯಲ್ಲಿ ನಿಲ್ಲಲಿದೆ ಎಂದು ಹೇಳಿದ್ದಾರೆ. ಈ ಯೋಜನೆಯಿಂದ ಸುಮಾರು 7,000 ನೇರ ಮತ್ತು ಪರೋಕ್ಷ ಉದ್ಯೋಗಗಳು ಸೃಷ್ಟಿಯಾಗಲಿದ್ದು, ವಿದ್ಯುತ್, ಕೂಲಿಂಗ್ ತಂತ್ರಜ್ಞಾನ ಹಾಗೂ ನೆಟ್‌ವರ್ಕಿಂಗ್ ಕ್ಷೇತ್ರಗಳಿಗೂ ಬಲ ಸಿಗಲಿದೆ. ಜೊತೆಗೆ, ಪರಿಸರ ಸ್ನೇಹಿ ಇಂಧನ ಮತ್ತು ನೀರು ಪೋಲಾಗದ ತಂತ್ರಜ್ಞಾನದ ಬಳಕೆಗೆ ಆಧ್ಯತೆ ನೀಡಲಾಗುತ್ತಿದೆ.