ಅಮೆರಿಕದ ಮಹತ್ವದ ಮೂಲಸೌಕರ್ಯ, ಸರ್ಕಾರಿ ಸಂಸ್ಥೆಗಳ ಮೇಲೆ ದಾಳಿ ನಡೆಸುತ್ತಿದ್ದ ಚೀನಾ ಮೂಲದ ಹ್ಯಾಕಿಂಗ್ ಜಾಲವನ್ನು ಧ್ವಂಸಗೊಳಿಸಿದ ಎಫ್‌ಬಿಐ

ಅಮೆರಿಕದ ನ್ಯಾಯಾಂಗ ಇಲಾಖೆ (DOJ) ಮತ್ತು ಫೆಡರಲ್ ಬ್ಯೂರೋ ಆಫ್ ಇನ್ವೆಸ್ಟಿಗೇಶನ್ (FBI) ನಡೆಸಿದ ಜಂಟಿ ಕಾರ್ಯಾಚರಣೆಯಲ್ಲಿ, ಚೀನಾ ಬೆಂಬಲಿತ ಪ್ರಭಾವಿ ಸೈಬರ್ ಗೂಢಚಾರಿಕೆ ಜಾಲವನ್ನು ಯಶಸ್ವಿಯಾಗಿ ಧ್ವಂಸಗೊಳಿಸಲಾಗಿದೆ. ಅಮೆರಿಕದ ಸರ್ಕಾರಿ ಸಂಸ್ಥೆಗಳು ಹಾಗೂ ಮೂಲಸೌಕರ್ಯಗಳ ಮೇಲೆ ಸೈಬರ್ ದಾಳಿ ನಡೆಸಲು ಬಳಸಲಾಗುತ್ತಿದ್ದ "ಕ್ಯೂಸ್ಕ್ಯಾನ್" (QScan) ಮತ್ತು "ಕ್ಯೂಟಿರೂಟರ್" (QTRouter) ಎಂಬ ಎರಡು ಪ್ರಮುಖ ಹ್ಯಾಕಿಂಗ್ ಪ್ಲಾಟ್‌ಫಾರ್ಮ್‌ಗಳ ಇಂಟರ್ನೆಟ್ ಡೊಮೇನ್‌ಗಳನ್ನು ಫೆಡರಲ್ ನ್ಯಾಯಾಲಯದ ಆದೇಶದಂತೆ ವಶಪಡಿಸಿಕೊಳ್ಳಲಾಗಿದೆ. ಕ್ಯಾಲಿಫೋರ್ನಿಯಾದ ದಕ್ಷಿಣ ಜಿಲ್ಲಾ ನ್ಯಾಯಾಲಯದಲ್ಲಿ ಸಲ್ಲಿಕೆಯಾಗಿರುವ ದಾಖಲೆಗಳ ಪ್ರಕಾರ, "ಕ್ಯೂಟಿಎಫ್‌ವೈ" (QTFY) ಎಂಬ ಚೀನಾ ಮೂಲದ ಹ್ಯಾಕರ್ಸ್ ಗುಂಪು ಈ ಕೃತ್ಯದ ಹಿಂದೆ ಕಾರ್ಯಾಚರಿಸುತ್ತಿತ್ತು. 2018 ರಿಂದಲೂ ಸಕ್ರಿಯವಾಗಿದ್ದ ಈ ಗುಂಪು, ಕ್ಯೂಸ್ಕ್ಯಾನ್ ಮೂಲಕ ಇಂಟರ್ನೆಟ್‌ನಲ್ಲಿರುವ ದುರ್ಬಲ ಐಒಟಿ (IoT) ಸಾಧನಗಳನ್ನು ಗುರುತಿಸಿ ಸ್ವಯಂಚಾಲಿತವಾಗಿ ವೈರಸ್ ತಗುಲಿಸುತ್ತಿತ್ತು. ನಂತರ ಆ ಸಾಧನಗಳನ್ನು ಕ್ಯೂಟಿರೂಟರ್ ಜಾಲಕ್ಕೆ ಸೇರಿಸಿ, ತಮ್ಮ ಸೈಬರ್ ದಾಳಿಯ ನೈಜ ಮೂಲವನ್ನು ಮರೆಮಾಚಲು ಬಳಸಿಕೊಳ್ಳುತ್ತಿತ್ತು. ನಾಸಾ (NASA), ಫೆಡರಲ್ ರಿಸರ್ವ್, ಅಮೆರಿಕದ ಇಂಧನ ಇಲಾಖೆ, ಯುಎಸ್ ಸೆನೆಟ್ ಹಾಗೂ ಪ್ರಮುಖ ಆರೋಗ್ಯ ಮತ್ತು ಟೆಲಿಕಾಂ ವಲಯದ ಸಂಸ್ಥೆಗಳು ಈ ಹ್ಯಾಕಿಂಗ್ ಜಾಲದ ಗುರಿಯಾಗಿದ್ದವು. ಈ ಮಾಲ್‌ವೇರ್‌ಗಳಲ್ಲಿ ಹಾರ್ಡ್‌ಕೋಡ್ ಮಾಡಲಾಗಿದ್ದ ಮುಖ್ಯ ಡೊಮೇನ್‌ಗಳನ್ನೇ ಎಫ್‌ಬಿಐ ಜಪ್ತಿ ಮಾಡಿದ್ದರಿಂದ, ಪ್ರಪಂಚದಾದ್ಯಂತ ಈ ಸೈಬರ್ ನೆಟ್‌ವರ್ಕ್ ಸಂಪೂರ್ಣವಾಗಿ ನಿಷ್ಕ್ರಿಯಗೊಂಡಿದೆ. ಕಾರ್ಯಾಚರಣೆಯ ಬೆನ್ನಲ್ಲೇ ಎಫ್‌ಬಿಐ ಮತ್ತು ರಾಷ್ಟ್ರೀಯ ಭದ್ರತಾ ಸಂಸ್ಥೆಗಳು ಜಂಟಿ ಮಾರ್ಗದರ್ಶಿ ಬಿಡುಗಡೆ ಮಾಡಿದ್ದು, ಡಿಜಿಟಲ್ ಸಾಧನಗಳ ಭದ್ರತೆಯನ್ನು ಹೆಚ್ಚಿಸಿಕೊಳ್ಳುವಂತೆ ಎಚ್ಚರಿಕೆ ನೀಡಿವೆ.