ಸಬ್ ಜೂನಿಯರ್ ರಾಷ್ಟ್ರೀಯ ಫುಟ್‌ಬಾಲ್ ಟೂರ್ನಿಗೆ ಹೊಸ 8v8 ಮಾದರಿ ಘೋಷಿಸಿದ ಎಐಎಫ್‌ಎಫ್

ಆಲ್ ಇಂಡಿಯಾ ಫುಟ್‌ಬಾಲ್ ಫೆಡರೇಶನ್ (ಎಐಎಫ್‌ಎಫ್) 2026-27ರ ಋತುವಿನ ಸಬ್ ಜೂನಿಯರ್ ಬಾಲಕ ಮತ್ತು ಬಾಲಕಿಯರ ರಾಷ್ಟ್ರೀಯ ಫುಟ್‌ಬಾಲ್ ಚಾಂಪಿಯನ್‌ಷಿಪ್‌ಗಳಿಗಾಗಿ ನೂತನ ಸ್ಪರ್ಧಾತ್ಮಕ ಮಾದರಿಯನ್ನು ಘೋಷಿಸಿದೆ. ಫೀಫಾ ಯು15 ವಿಶ್ವಕಪ್ ಮಾರ್ಗಸೂಚಿಗಳಿಗೆ ಅನುಗುಣವಾಗಿ ವಿನ್ಯಾಸಗೊಳಿಸಲಾದ ಈ ಪರಿಷ್ಕೃತ ವ್ಯವಸ್ಥೆಯು ಭಾರತದಲ್ಲಿ ತಳಮಟ್ಟದ ಫುಟ್‌ಬಾಲ್ ಅಭಿವೃದ್ಧಿಯನ್ನು ಉತ್ತೇಜಿಸುವ ಮತ್ತು ಯುವ ಆಟಗಾರರಲ್ಲಿ ಕೌಶಲ್ಯ ಬೆಳೆಸುವ ಗುರಿಯನ್ನು ಹೊಂದಿದೆ. ಹೊಸ ತಾಂತ್ರಿಕ ನಿಯಮಗಳ ಪ್ರಕಾರ, ಪಂದ್ಯಗಳನ್ನು 68 ಮೀಟರ್ ಉದ್ದ ಮತ್ತು 50 ಮೀಟರ್ ಅಗಲದ ಸಣ್ಣ ಮೈದಾನದಲ್ಲಿ 8 x 8 (ತಲಾ 8 ಆಟಗಾರರ) ಮಾದರಿಯಲ್ಲಿ ನಡೆಸಲಾಗುತ್ತದೆ. ಪ್ರತಿಯೊಂದು ಪಂದ್ಯವು 20 ನಿಮಿಷಗಳ ಎರಡು ಭಾಗಗಳನ್ನು ಒಳಗೊಂಡಿರಲಿದ್ದು, 5 ನಿಮಿಷಗಳ ಮಧ್ಯಂತರವಿರುತ್ತದೆ. 23 ಮೀಟರ್‌ಗಳಲ್ಲಿ ಆಫ್‌ಸೈಡ್ ರೇಖೆಯನ್ನು ಗುರುತಿಸಲಾಗುತ್ತದೆ. ಜೊತೆಗೆ ಅನ್‌ಲಿಮಿಟೆಡ್ ರೋಲಿಂಗ್ ಸಬ್‌ಸ್ಟಿಟ್ಯೂಷನ್‌ಗೆ ಅವಕಾಶ ನೀಡಲಾಗಿದ್ದು, ಆಟಗಾರರಿಗೆ ಮೈದಾನದಲ್ಲಿ ಹೆಚ್ಚಿನ ಸಮಯ ನೀಡಲು ಇದು ನೆರವಾಗಲಿದೆ. ರಾಜ್ಯ ಫುಟ್‌ಬಾಲ್ ಸಂಸ್ಥೆಗಳು ಎಐಎಫ್‌ಎಫ್ ಸಿಸ್ಟಮ್‌ನಲ್ಲಿ 50 ಆಟಗಾರರವರೆಗೆ ನೋಂದಾಯಿಸಿಕೊಳ್ಳಬಹುದು ಮತ್ತು ಅಂತಿಮವಾಗಿ 12 ರಿಂದ 16 ಆಟಗಾರರ ತಂಡವನ್ನು ಪಂದ್ಯಕ್ಕೆ ಆಯ್ಕೆ ಮಾಡಬಹುದು. ಸಣ್ಣ ಮಾದರಿಯ ಆಟವು ಯುವ ಆಟಗಾರರ ನಿರ್ಧಾರ ಕೈಗೊಳ್ಳುವ ಸಾಮರ್ಥ್ಯ ಮತ್ತು ತಾಂತ್ರಿಕ ಪ್ರಾವೀಣ್ಯತೆಯನ್ನು ಹೆಚ್ಚಿಸಲಿದೆ ಎಂದು ಎಐಎಫ್‌ಎಫ್ ತಿಳಿಸಿದೆ. ಭಾರತೀಯ ಫುಟ್‌ಬಾಲ್‌ನ ಭವಿಷ್ಯಕ್ಕಾಗಿ ಇದು ಮಹತ್ವದ ಹೆಜ್ಜೆಯಾಗಿದೆ.