ದೇಶಾದ್ಯಂತ ಡಿಆರ್‌ಐ ಬೃಹತ್ ಕಾರ್ಯಾಚರಣೆ: ₹62 ಕೋಟಿ ಮೌಲ್ಯದ 41 ಕೆಜಿ ಚಿನ್ನ ವಶ, 24 ಮಂದಿ ಬಂಧನ

ಸಂಘಟಿತ ಕಳ್ಳಸಾಗಣೆ ಜಾಲಗಳ ವಿರುದ್ಧದ ಬೃಹತ್ ಕಾರ್ಯಾಚರಣೆಯಲ್ಲಿ, ಕಂದಾಯ ಗುಪ್ತಚರ ನಿರ್ದೇಶನಾಲಯವು (ಡಿಆರ್‌ಐ) ಭಾರತದಾದ್ಯಂತ ಆರು ಪ್ರತ್ಯೇಕ ದಾಳಿಗಳನ್ನು ನಡೆಸಿ ಸುಮಾರು ₹62 ಕೋಟಿ ಮೌಲ್ಯದ 41 ಕೆಜಿ ವಿದೇಶಿ ಮೂಲದ ಚಿನ್ನವನ್ನು ವಶಪಡಿಸಿಕೊಂಡಿದೆ. ಈ ಕಾರ್ಯಾಚರಣೆಗಳಲ್ಲಿ ಮೂವರು ವಿದೇಶಿ ಪ್ರಜೆಗಳು ಸೇರಿದಂತೆ 24 ಜನರನ್ನು ಬಂಧಿಸಲಾಗಿದೆ. ದೆಹಲಿ, ಪಂಜಾಬ್ ಮತ್ತು ಭಾರತ-ಬಾಂಗ್ಲಾದೇಶ ಗಡಿ ಪ್ರದೇಶಗಳಲ್ಲಿ ವಿಮಾನ, ರೈಲು ಹಾಗೂ ಗಡಿ ಮಾರ್ಗಗಳ ಮೂಲಕ ನಡೆಯುತ್ತಿದ್ದ ರಹಸ್ಯ ಜಾಲಗಳನ್ನು ಡಿಆರ್‌ಐ ಬಯಲಿಗೆಳೆದಿದೆ. ದೆಹಲಿಯಲ್ಲಿ ನಡೆದ ಪ್ರಮುಖ ದಾಳಿಯಲ್ಲಿ, ಕಳ್ಳಸಾಗಣೆ ಮಾಡಿದ ಚಿನ್ನದ ಬಾರ್‌ಗಳನ್ನು ಕರಗಿಸಿ ಆಭರಣಗಳಾಗಿ ಪರಿವರ್ತಿಸಲು ಬಳಸುತ್ತಿದ್ದ ರಹಸ್ಯ ಉತ್ಪಾದನಾ ಘಟಕವನ್ನು ಅಧಿಕಾರಿಗಳು ಪತ್ತೆಹಚ್ಚಿದ್ದಾರೆ. ಅಲ್ಲಿ 4 ಕೆಜಿ ವಿದೇಶಿ ಚಿನ್ನದ ಬಾರ್‌ಗಳು ಹಾಗೂ 6.2 ಕೆಜಿ ಚಿನ್ನದ ಸರಗಳನ್ನು ವಶಪಡಿಸಿಕೊಳ್ಳಲಾಗಿದೆ. ಹಾಗೆಯೇ, ಭಾರತ-ಬಾಂಗ್ಲಾದೇಶ ಗಡಿಯ ಹಲ್ದಾರ್‌ಪಾರಾ ಗಡಿ ಚೌಕಿ ಬಳಿ ಬಿಎಸ್‌ಎಫ್ ಸಹಯೋಗದೊಂದಿಗೆ 11.3 ಕೆಜಿ ತೂಕದ 89 ಚಿನ್ನದ ಗಟ್ಟಿಗಳನ್ನು ಜಪ್ತಿ ಮಾಡಲಾಗಿದೆ. ವಿದೇಶಿ ಚಿನ್ನದ ಅಕ್ರಮ ಸಾಗಣೆಯನ್ನು ತಡೆಯಲು ಕೇಂದ್ರ ಹಣಕಾಸು ಸಚಿವಾಲಯವು ದೇಶದ ಗಡಿ ಹಾಗೂ ವಿಮಾನ ನಿಲ್ದಾಣಗಳಲ್ಲಿ ತೀವ್ರ ನಿಗಾ ವಹಿಸಿದೆ.