ಭಾರತ ಹಾಗೂ ಜಪಾನ್ ನಡುವೆ ಸೆಪ್ಟೆಂಬರ್ 22ರಂದು ಐತಿಹಾಸಿಕ ಮೊದಲ ಟಿ20 ಕ್ರಿಕೆಟ್ ಪಂದ್ಯ

ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ (ಬಿಸಿಸಿಐ) ಹಾಗೂ ಜಪಾನ್ ಕ್ರಿಕೆಟ್ ಅಸೋಸಿಯೇಷನ್ (ಜೆಸಿಎ) ಜಂಟಿಯಾಗಿ ಪ್ರಕಟಿಸಿರುವಂತೆ, ಭಾರತ ಮತ್ತು ಜಪಾನ್ ಹಿರಿಯರ ಪುರುಷರ ತಂಡಗಳ ನಡುವೆ ಸೆಪ್ಟೆಂಬರ್ 22, 2026 ರಂದು ಚಾರಿತ್ರಿಕ ಮೊದಲ ಟಿ20 ಅಂತರರಾಷ್ಟ್ರೀಯ ಪಂದ್ಯ ನಡೆಯಲಿದೆ. ಈ ಮೈಲಿಗಲ್ಲಿನ ಪಂದ್ಯವು ಜಪಾನ್‌ನ ತೋಚಿಗಿ ಪ್ರಾಂತ್ಯದ ಸಾನೋ ಅಂತರರಾಷ್ಟ್ರೀಯ ಕ್ರಿಕೆಟ್ ಮೈದಾನದಲ್ಲಿ ಆಯೋಜನೆಗೊಳ್ಳಲಿದೆ. 'ಸುಜುಕಿ ಕಪ್' ಹೆಸರಿನಲ್ಲಿ ನಡೆಯಲಿರುವ ಈ ಪಂದ್ಯವು ಭಾರತ ಹಾಗೂ ಜಪಾನ್ ನಡುವಿನ ರಾಜತಾಂತ್ರಿಕ ಸಂಬಂಧಗಳ 75ನೇ ವರ್ಷಾಚರಣೆಯ ಸಂಕೇತವಾಗಿದೆ. ಉಭಯ ದೇಶಗಳ ನಡುವಿನ ಕ್ರೀಡಾ ಮತ್ತು ಸಾಂಸ್ಕೃತಿಕ ಬಾಂಧವ್ಯವನ್ನು ವೃದ್ಧಿಸುವ "ಸ್ಪೋರ್ಟ್ 75" ಉಪಕ್ರಮದ ಭಾಗವಾಗಿ ಇದು ಆಯೋಜನೆಗೊಳ್ಳುತ್ತಿದ್ದು, ಐಚಿ-ನಗೋಯಾದಲ್ಲಿ ನಡೆಯಲಿರುವ 2026ರ ಏಷ್ಯನ್ ಗೇಮ್ಸ್‌ನ ಕ್ರಿಕೆಟ್ ಪಂದ್ಯಾವಳಿಗೆ ಪ್ರಮುಖ ಪೂರ್ವಭಾವಿ ಸಿದ್ಧತೆಯಾಗಿ ಭಾರತೀಯ ತಂಡಕ್ಕೆ ನೆರವಾಗಲಿದೆ. ಬಿಸಿಸಿಐ ಕಾರ್ಯದರ್ಶಿ ದೇವಾಜಿತ್ ಸೈಕಿಯಾ ಮಾತನಾಡಿ, ಈ ಪಂದ್ಯವು ಕ್ರಿಕೆಟ್ ಕ್ರೀಡೆಯನ್ನು ಸಾಂಪ್ರದಾಯಿಕ ಗಡಿಗಳನ್ನು ಮೀರಿ ಪೂರ್ವ ಏಷ್ಯಾದ ಹೊಸ ಪ್ರೇಕ್ಷಕರಿಗೆ ತಲುಪಿಸುವ ನಿಟ್ಟಿನಲ್ಲಿ ಮಹತ್ವದ ಹೆಜ್ಜೆಯಾಗಿದೆ ಎಂದು ಬಣ್ಣಿಸಿದ್ದಾರೆ. ವಿಶ್ವದ ದೊಡ್ಡ ಕ್ರಿಕೆಟ್ ಮಂಡಳಿಯಾಗಿ ಕ್ರೀಡೆಯ ಜಾಗತಿಕ ಬೆಳವಣಿಗೆಗೆ ಬೆಂಬಲ ನೀಡುವುದು ಬಿಸಿಸಿಐ ಕರ್ತವ್ಯ ಎಂದಿದ್ದಾರೆ. ಪಂದ್ಯದ ಟಿಕೆಟ್‌ಗಳು ಈಗಾಗಲೇ ಪೂರ್ಣವಾಗಿ ಮಾರಾಟವಾಗಿದ್ದು, ಜಪಾನ್‌ನಲ್ಲಿ ಕ್ರಿಕೆಟ್‌ಗೆ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗಿದೆ.