ಕರ್ನಾಟಕ ಸರ್ಕಾರವು ತನ್ನ 'ಸ್ಟಾರ್ಟ್‌ಅಪ್ ನೀತಿ 2025-30' ರ ಎಲಿವೇಟ್ (ELEVATE) ಕಾರ್ಯಕ್ರಮದಡಿ 'ಗವರ್ನ್‌ಮೆಂಟ್ ಫಸ್ಟ್' (Government First) ಎಂಬ ಮಹತ್ವಾಕಾಂಕ್ಷೆಯ ಯೋಜನೆಯನ್ನು ಪ್ರಾರಂಭಿಸಿದೆ. ಮುಂದಿನ ಮೂರು ವರ್ಷಗಳಲ್ಲಿ ₹25 ಕೋಟಿ ವೆಚ್ಚದಲ್ಲಿ ಅನುಷ್ಠಾನಗೊಳ್ಳಲಿರುವ ಈ ಯೋಜನೆಯು ಸರ್ಕಾರಿ ಇಲಾಖೆಗಳನ್ನು ನವೋದ್ಯಮಗಳ ತಂತ್ರಜ್ಞಾನದ ಮೊದಲ ಗ್ರಾಹಕನ್ನಾಗಿ ಮಾಡುವ ಗುರಿ ಹೊಂದಿದೆ. ಇದರಡಿ ಸುಮಾರು 100 ಪ್ರಮುಖ ಸ್ಟಾರ್ಟ್‌ಅಪ್‌ಗಳಿಗೆ ಪ್ರತಿಯೊಂದಕ್ಕೂ ₹25 ಲಕ್ಷದವರೆಗೆ ಕಾರ್ಯಾದೇಶ (Work Order) ನೀಡಿ, ತಮ್ಮ ತಂತ್ರಜ್ಞಾನಗಳನ್ನು ಪ್ರಾಯೋಗಿಕವಾಗಿ ಪರೀಕ್ಷಿಸಲು ಅವಕಾಶ ಕಲ್ಪಿಸಲಾಗುತ್ತದೆ.
ಮಾಹಿತಿ ತಂತ್ರಜ್ಞಾನ ಮತ್ತು ಜೈವಿಕ ತಂತ್ರಜ್ಞಾನ ಸಚಿವ ಪ್ರಿಯಾಂಕ್ ಖರ್ಗೆ ಈ ಯೋಜನೆಯ ಕುರಿತು ಮಾತನಾಡಿ, ಖಾಸಗಿ ವಲಯದ ಮಾನ್ಯತೆಗಾಗಿ ಕಾಯುವ ಬದಲಾಗಿ ಸರ್ಕಾರವೇ ನವೋದ್ಯಮಗಳ ಮೊದಲ ಪಾಲುದಾರನಾಗಲಿದೆ ಎಂದು ತಿಳಿಸಿದರು. ಡಿಜಿಟಲ್ ಆಡಳಿತ, ಆರೋಗ್ಯ, ಕೃಷಿ, ಸಾರಿಗೆ ಮತ್ತು ಕೃತಕ ಬುದ್ಧಿಮತ್ತೆ (AI) ಕ್ಷೇತ್ರದಲ್ಲಿ ಸಾರ್ವಜನಿಕ ಸಮಸ್ಯೆಗಳಿಗೆ ಪರಿಹಾರ ಕಂಡುಕೊಳ್ಳಲು ಈ ಪೈಲಟ್ ಯೋಜನೆಗಳು ನೆರವಾಗಲಿವೆ.
ಈ ಯೋಜನೆಯಲ್ಲಿ ಸರ್ಕಾರ ಪ್ರಕಟಿಸುವ ಸವಾಲುಗಳಿಗೆ ಉತ್ತರಿಸುವ ಜೊತೆಗೆ, ಸ್ಟಾರ್ಟ್‌ಅಪ್‌ಗಳೇ ನೇರವಾಗಿ ತಮ್ಮ ಪರಿಹಾರಗಳನ್ನು ಇಲಾಖೆಗಳಿಗೆ ಪ್ರಸ್ತಾಪಿಸಲು ಅವಕಾಶ ಕಲ್ಪಿಸಲಾಗಿದೆ. ನವೋದ್ಯಮಗಳಿಗೆ ಸರ್ಕಾರಿ ವಲಯದ ಮುಂಚಿನ ಅನುಭವ ಕಡ್ಡಾಯವಲ್ಲ ಹಾಗೂ ಅವರು ತಮ್ಮ ಬೌದ್ಧಿಕ ಆಸ್ತಿ ಹಕ್ಕುಗಳನ್ನು ತಮ್ಮ ಬಳಿಯೇ ಇಟ್ಟುಕೊಳ್ಳಬಹುದು. ಪ್ರಾಯೋಗಿಕ ಪರೀಕ್ಷೆಯಲ್ಲಿ ಯಶಸ್ವಿಯಾಗುವ ತಂತ್ರಜ್ಞಾನಗಳನ್ನು ಆಡಳಿತದಲ್ಲಿ ವ್ಯಾಪಕವಾಗಿ ಬಳಸಿಕೊಳ್ಳಲು ಸರ್ಕಾರ ಶಿಫಾರಸು ಮಾಡಲಿದೆ.
