ಇ-ಸಾರಿಗೆಗೆ ಉತ್ತೇಜನ: ನೀತಿ ಆಯೋಗದಿಂದ ‘ಪ್ಯಾಕ್ಟ್’ ಮತ್ತು ‘ಝೆಡ್‌ಇಟಿ ಮಾರ್ಕೆಟ್‌ಪ್ಲೇಸ್’ ಚಾಲನೆ

ಭಾರತ ಸರಕಾರದ ನೀತಿ ಆಯೋಗವು ದೇಶದ ಸರಕು ಸಾಗಣೆ ರಂಗದಲ್ಲಿ ಪರಿಸರ ಸ್ನೇಹಿ ಇ-ವಾಹನಗಳ ಬಳಕೆಯನ್ನು ಪ್ರೋತ್ಸಾಹಿಸಲು ‘ಪ್ಲಾಟ್‌ಫಾರ್ಮ್ ಫಾರ್ ಅಗ್ರಿಗೇಟಿಂಗ್ ಕ್ಲೀನ್ ಟ್ರಾನ್ಸ್‌ಪೋರ್ಟ್’ (PACT) ಮತ್ತು ‘ಝೆರೊ ಎಮಿಷನ್ ಟ್ರಕ್ (ZET) ಮಾರ್ಕೆಟ್‌ಪ್ಲೇಸ್’ ಎಂಬ ಎರಡು ಪ್ರಮುಖ ಡಿಜಿಟಲ್ ವೇದಿಕೆಗಳನ್ನು ಆರಂಭಿಸಿದೆ. ಹೊಸ ದೆಹಲಿಯಲ್ಲಿ ನಡೆದ 5ನೇ ಇ-ಫಾಸ್ಟ್ ಇಂಡಿಯಾ ಶೃಂಗಸಭೆ 2026ರ ವೇಳೆ ನೀತಿ ಆಯೋಗದ ಸದಸ್ಯ ರಾಜೀವ್ ಗೌಬಾ ಈ ಯೋಜನೆಗಳಿಗೆ ಚಾಲನೆ ನೀಡಿದರು. ಭಾರತದ ರಸ್ತೆಗಳಲ್ಲಿ ಚಲಿಸುವ ಒಟ್ಟು ವಾಹನಗಳಲ್ಲಿ ಭಾರೀ ತೂಕದ ಟ್ರಕ್‌ಗಳು ಕೇವಲ ಶೇಕಡಾ 3 ರಿಂದ 4 ರಷ್ಟಿದ್ದರೂ, ಸಾರಿಗೆ ವಲಯದಿಂದ ಹೊರಸೂಸುವ ಒಟ್ಟು ಇಂಗಾಲದ ಮೂರನೇ ಒಂದಕ್ಕಿಂತ ಹೆಚ್ಚು ಭಾಗಕ್ಕೆ ಇವೇ ಕಾರಣವಾಗಿವೆ. ಪ್ರಸ್ತುತ ದೇಶದ ಶೇಕಡಾ 70 ರಷ್ಟು ಸರಕು ಸಾಗಣೆಯು ರಸ್ತೆ ಮೂಲಕವೇ ನಡೆಯುತ್ತಿರುವುದರಿಂದ, ಹಸಿರುಮನೆ ಅನಿಲ ಹೊರಸೂಸುವಿಕೆಯನ್ನು ಕಡಿಮೆ ಮಾಡಲು ಎಲೆಕ್ಟ್ರಿಕ್ ಟ್ರಕ್‌ಗಳ ಅಳವಡಿಕೆ ಅತ್ಯಂತ ಅಗತ್ಯವಾಗಿದೆ. ಹೊಸದಾಗಿ ಚಾಲನೆ ನೀಡಲಾದ 'ಪ್ಯಾಕ್ಟ್' ವೇದಿಕೆಯು ಪ್ರಮುಖ ಸರಕು ರವಾನೆದಾರರು, ಇ-ಕಾಮರ್ಸ್ ಸಂಸ್ಥೆಗಳು ಮತ್ತು ಲಾಜಿಸ್ಟಿಕ್ಸ್ ಪೂರೈಕೆದಾರರಿಂದ ವಿದ್ಯುತ್ ಚಾಲಿತ ಟ್ರಕ್‌ಗಳ ಬೇಡಿಕೆಯನ್ನು ಒಟ್ಟುಗೂಡಿಸುತ್ತದೆ. ಮತ್ತೊಂದೆಡೆ 'ಝೆಡ್‌ಇಟಿ ಮಾರ್ಕೆಟ್‌ಪ್ಲೇಸ್' ಬಿ2ಬಿ ಮಾದರಿಯಲ್ಲಿ ಇ-ಟ್ರಕ್ ತಯಾರಕರು, ಫ್ಲೀಟ್ ನಿರ್ವಾಹಕರು, ಚಾರ್ಜಿಂಗ್ ಪಾಯಿಂಟ್ ಪೂರೈಕೆದಾರರು ಮತ್ತು ಕ್ಲೀನ್-ಟೆಕ್ ಸ್ಟಾರ್ಟ್‌ಅಪ್‌ಗಳನ್ನು ಒಂದೇ ಸೂರಿನಡಿ ತರುತ್ತದೆ. ಸಾಗಣೆ ವೆಚ್ಚ ತಗ್ಗಿಸಲು ಹಾಗೂ ಮುಖ್ಯ ಹೆದ್ದಾರಿಗಳಲ್ಲಿ ಅಗತ್ಯ ಚಾರ್ಜಿಂಗ್ ಮೂಲಸೌಕರ್ಯ ಕಲ್ಪಿಸಲು ಈ ಯೋಜನೆಗಳು ನೆರವಾಗಲಿವೆ.