ಸಂಡೂರಿನಲ್ಲಿ 3 ಮೊಬೈಲ್ ಹೆಲ್ತ್ ಯೂನಿಟ್‌ಗಳಿಗೆ ಚಾಲನೆ: 90 ಗ್ರಾಮಗಳ ಮನೆ ಬಾಗಿಲಿಗೆ ಆರೋಗ್ಯ ಸೇವೆ

ಗ್ರಾಮೀಣ ಭಾಗದ ಜನರು ಉಚಿತ ಹಾಗೂ ಗುಣಮಟ್ಟದ ವೈದ್ಯಕೀಯ ಸೇವೆಗಾಗಿ ದೂರದ ಆಸ್ಪತ್ರೆಗಳಿಗೆ ಅಲೆದಾಡುವುದನ್ನು ತಪ್ಪಿಸಲು ಸಂಡೂರು ವಿಧಾನಸಭಾ ಕ್ಷೇತ್ರದಲ್ಲಿ ಮೂರು ಮೊಬೈಲ್ ಹೆಲ್ತ್ ಯೂನಿಟ್‌ಗಳಿಗೆ (ಆರೋಗ್ಯ ಘಟಕಗಳು) ಗುರುವಾರ ಚಾಲನೆ ನೀಡಲಾಯಿತು. JSW ಸಂಸ್ಥೆಯ CSR ಅನುದಾನದ ಸಹಯೋಗದೊಂದಿಗೆ ಆರಂಭಗೊಂಡಿರುವ ಈ ಜನಪರ ಯೋಜನೆಗೆ ಸಂಡೂರು ಶಾಸಕಿ ಅನ್ನಪೂರ್ಣ ತುಕಾರಾಮ್ ಅವರು ಚಾಲನೆ ನೀಡಿದರು. ಇದೇ ಸಂದರ್ಭದಲ್ಲಿ ಕ್ಷೇತ್ರದ 90 ಗ್ರಾಮಗಳಿಗೆ ಈ ವಾಹನಗಳು ಭೇಟಿ ನೀಡುವ ವಾರ್ಷಿಕ ವೇಳಾಪಟ್ಟಿಯ ಕ್ಯಾಲೆಂಡರ್ ಸಹ ಬಿಡುಗಡೆಗೊಳಿಸಲಾಯಿತು. ಈ ಮೊಬೈಲ್ ಆರೋಗ್ಯ ಘಟಕಗಳು ಸಂಡೂರು ತಾಲೂಕಿನ 90 ಗ್ರಾಮಗಳಿಗೆ ನಿಗದಿತ ವೇಳಾಪಟ್ಟಿಯಂತೆ ಭೇಟಿ ನೀಡಿ ಸ್ಥಳದಲ್ಲಿಯೇ ಪ್ರಾಥಮಿಕ ಆರೋಗ್ಯ ತಪಾಸಣೆ ಹಾಗೂ ಅಗತ್ಯ ವೈದ್ಯಕೀಯ ಸೇವೆ ಒದಗಿಸಲಿವೆ. ಪ್ರತಿಯೊಂದು ಮೊಬೈಲ್ ಘಟಕದಲ್ಲೂ ಎಂಬಿಬಿಎಸ್ ವೈದ್ಯರು, ಫಾರ್ಮಸಿಸ್ಟ್, ಲ್ಯಾಬ್ ಟೆಕ್ನಿಷಿಯನ್, ಸೋಷಿಯಲ್ ಮೊಬಿಲೈಸರ್ ಹಾಗೂ ಚಾಲಕ ಕಮ್ ಅಟೆಂಡರ್ ಸಿಬ್ಬಂದಿ ಕಾರ್ಯನಿರ್ವಹಿಸಲಿದ್ದಾರೆ. ರಕ್ತ ಪರೀಕ್ಷೆ ಸೇರಿ ವಿವಿಧ ಮೂಲಭೂತ ಪರೀಕ್ಷೆಗಳನ್ನು ನಡೆಸುವುದರ ಜೊತೆಗೆ ಉಚಿತ ಔಷಧೋಪಚಾರ ಮತ್ತು ಆರೋಗ್ಯ ಜಾಗೃತಿ ನೀಡಲಾಗುತ್ತದೆ. ವಿಶೇಷವಾಗಿ ವಯೋವೃದ್ಧರು, ಮಹಿಳೆಯರು, ಮಕ್ಕಳು ಹಾಗೂ ಸಾರಿಗೆ ಸೌಲಭ್ಯ ಕೊರತೆ ಇರುವ ದೂರದ ಹಳ್ಳಿಗಳ ನಿವಾಸಿಗಳಿಗೆ ಈ ಮೊಬೈಲ್ ಆರೋಗ್ಯ ಸೇವೆಗಳು ದೊಡ್ಡ ಮಟ್ಟದ ಅನುಕೂಲ ಕಲ್ಪಿಸಲಿವೆ. ಗಣಿ ನಾಡಾದ ಸಂಡೂರಿನ ಗ್ರಾಮೀಣ ಭಾಗದಲ್ಲಿ ಬಾಗಿಲಿಗೆ ಬಂದ ಈ ಆರೋಗ್ಯ ಸೇವೆಗೆ ತಾಲೂಕಿನ ಸಾರ್ವಜನಿಕರು ಹಾಗೂ ಗ್ರಾಮಸ್ಥರು ಹರ್ಷ ವ್ಯಕ್ತಪಡಿಸಿದ್ದಾರೆ.