ಲಡಾಖ್‌ಗೆ ಚುನಾಯಿತ ಆಡಳಿತ ಮಂಡಳಿ ರಚನೆ: ವಿಧಿ 371 ರ ಅಡಿಯಲ್ಲಿ ಹೊಸ 'ಅಧ್ಯಾಯ ಕೆ' ಪ್ರಸ್ತಾಪಿಸಿದ ಕೇಂದ್ರ ಗೃಹ ಸಚಿವಾಲಯ

ಕೇಂದ್ರ ಗೃಹ ಸಚಿವಾಲಯವು ಲಡಾಖ್ ಕೇಂದ್ರಾಡಳಿತ ಪ್ರದೇಶಕ್ಕೆ ಶಾಸನಬದ್ಧ ಅಧಿಕಾರ ಹೊಂದಿರುವ ಚುನಾಯಿತ ಆಡಳಿತ ಮಂಡಳಿಯನ್ನು ರಚಿಸಲು ಸಂವಿಧಾನದ ವಿಧಿ 371 ರ ಅಡಿಯಲ್ಲಿ 'ಅಧ್ಯಾಯ ಕೆ' ಎಂಬ ಹೊಸ ಸಾಂವಿಧಾನಿಕ ತಿದ್ದುಪಡಿಯನ್ನು ಪ್ರಸ್ತಾಪಿಸಿದೆ. ನವದೆಹಲಿಯಲ್ಲಿ ನಡೆದ ಉನ್ನತ ಮಟ್ಟದ ಉಪ ಸಮಿತಿ ಸಭೆಯಲ್ಲಿ ಗೃಹ ಸಚಿವಾಲಯದ ಅಧಿಕಾರಿಗಳು, ಲೇಹ್ ಅಪೆಕ್ಸ್ ಬಾಡಿ ಮತ್ತು ಕಾರ್ಗಿಲ್ ಡೆಮಾಕ್ರಟಿಕ್ ಅಲಯನ್ಸ್‌ನ ಪ್ರತಿನಿಧಿಗಳೊಂದಿಗೆ ಈ ಪ್ರಸ್ತಾವನೆಯ ಕುರಿತು ಚರ್ಚಿಸಿದರು. ಪ್ರಸ್ತಾವಿತ ವಿಧಿ 371(ಕೆ) ಪ್ರಕಾರ, ಲಡಾಖ್‌ಗೆ ನೇರವಾಗಿ ಚುನಾಯಿತವಾಗುವ ಆಡಳಿತ ಮಂಡಳಿಯನ್ನು ಸ್ಥಾಪಿಸಲಾಗುತ್ತದೆ. ಈ ಮಂಡಳಿಗೆ ಭೂಮಿ, ಸಂಸ್ಕೃತಿ, ಭಾಷೆ, ಅರಣ್ಯ, ಪರಿಸರ ಮತ್ತು ನೈಸರ್ಗಿಕ ಸಂಪನ್ಮೂಲಗಳಂತಹ ಪ್ರಮುಖ ವಿಷಯಗಳ ಮೇಲೆ ಶಾಸನಬದ್ಧ, ಕಾರ್ಯಾಂಗ ಮತ್ತು ಆರ್ಥಿಕ ಅಧಿಕಾರಗಳನ್ನು ನೀಡಲಾಗುತ್ತದೆ. ಪೂರ್ಣ ರಾಜ್ಯದರ್ಜೆ ನೀಡದೆಯೇ ಸ್ಥಳೀಯ ಜನರಿಗೆ ಪ್ರಜಾಸತ್ತಾತ್ಮಕ ಹಕ್ಕುಗಳನ್ನು ಒದಗಿಸುವ ಉದ್ದೇಶವನ್ನು ಈ ವಿಶೇಷ ಆಡಳಿತ ಮಾದರಿ ಹೊಂದಿದೆ. 2019 ರಲ್ಲಿ ಜಮ್ಮು ಮತ್ತು ಕಾಶ್ಮೀರ ಮರುಸಂಘಟನೆಯ ನಂತರ ಲಡಾಖ್ ಶಾಸಸಭೆಯಿಲ್ಲದ ಕೇಂದ್ರಾಡಳಿತ ಪ್ರದೇಶವಾಗಿ ಮಾರ್ಪಟ್ಟಿತ್ತು. ಇದರಿಂದ ಸ್ಥಳೀಯ ಸಂಸ್ಕೃತಿ, ಪರಿಸರ ಮತ್ತು ಉದ್ಯೋಗ ರಕ್ಷಣೆಗೆ ಚುನಾಯಿತ ಸಂಸ್ಥೆ ಬೇಕು ಎಂಬ ಬೇಡಿಕೆ ತೀವ್ರಗೊಂಡಿತ್ತು. ಸರಕಾರದ ಈ ನೂತನ ಪ್ರಸ್ತಾವನೆಯನ್ನು ಸ್ಥಳೀಯ ನಾಯಕರು ಸ್ವಾಗತಿಸಿದ್ದಾರಾದರೂ, ಪ್ರಸ್ತಾವಿತ ಮಂಡಳಿ ಮತ್ತು ಪ್ರಸ್ತುತ ಚಾಲ್ತಿಯಲ್ಲಿರುವ ಬೆಟ್ಟಗಳ ಅಭಿವೃದ್ಧಿ ಮಂಡಳಿಗಳ ನಡುವಿನ ಅಧಿಕಾರ ಹಂಚಿಕೆಯ ಕುರಿತು ಲಿಖಿತ ಕರಡು ಪ್ರತಿಯನ್ನು ನೀಡುವಂತೆ ಮನವಿ ಮಾಡಿದ್ದಾರೆ.